Suliniutit pingasut Air Greenlandip 2020-mi angusaanut sunniuteqarluinnartut
Immikkut ittumik angusaqarneq pingasunik peqquteqarluinnartoq, Air Greenlandip 2018-imi februaarimili pisortaa Jacob Nitter Sørensen KNR-imut nassuiaavoq.
- Coronap nunarsuaq tamakkerlugu tunillaassuunnera killilersuinerillu aallussatta ilaannut sunniuteqanngillat. Assersuutigalugu allakkisarneq, nassiussalerineq, nunatta ilaani angallassineq, ujaasineq annaassiniarnerlu taavalu Namminersorlutik Oqartussallu kiffartuussinissamut isumaqatigiissutit, taanna oqarpoq nangillunilu:
- Isumalluutinik sulisunillu siorna aamma ikilisaavugut. Taamaalilluta malunnartumik aningaasartuutikinneruvugut.
Air Greenland 2022-mi tamakkiisumik aallusseqqilissasoq, Jacob Nitter Sørensen neriuppoq.
Timmisartuutileqatigiiffimmi sulisut arfiniliugaangata ataatsip sipaarniarnermi soraarsitaaneranik kinguneqartumik siorna maajimi soraarsitsiortorsimallutik, pisortaq oqarpoq. Sulisut 2020-p naanerani ukiup siulianit 93-inik ikinnerupput.
AAMMA ATUARUK Air Greenland 30,6 millioninik sinneqartooruteqartoq
- Namminersorlutik Oqartussat suleqatigilluarnerat taamatuttaaq peqqutaavoq. Nunatsinni attaveqarnerup attannissaa qulakkeerniarlugu timmisartuunneqarnissaminnut siorna inniminniinikkut kaaviaartitatigut annaasassaraluagut matussuserpaat, Jacob Nitter Sørensen oqarpoq.
Soraarsitsiortorneq Namminersorlutik Oqartussanillu isumaqatigiissuteqarneq Air Greenlandip millionilikkaanik amigartooruteqarnissaraluanik pinngitsoortitsipput. Air Greenlandilu sinneqartooruteqaraluartoq 58 millioninik 2019-imit angusakinneruvoq.
Ukioq immikkuullarissoq bilitsit akiinut sunniuteqartoq
Danmarkimi nunatsinnilu sulisut inuiaqatigiinnut pingaarutillit angalaannarsinnaaqqullugit, Danmarkip nunattalu akornanni timmisartuussisoqaannassasoq, Namminersorlutik Oqartussallu isumaqatigiissummut ilaavoq.
Timmisartuussalli ikippallaaqimmata timmisartuussinerit imminut akilersinnaasimanngillat. Taamaammat Air Greenland timmisartornermut bilitsinik akitsuilaartariaqarsimavoq.
AAMMA ATUARUK Nunatsinni silaannakkut angallanneq matuneqarmat: Soorlu naakkut tillutsilluni
- Angallassiinnarnissatsinnik tamatumalu imminut akilersinnaanissaanik oqimaaqatigiissaarivugut. Angallanneq nalinginnaaqqilerpat killilersuisoqarunnaarpallu angalasoqarluaqqilerpat nalinginnaasumik timmisartuusseqqilerumaarpugut, pisortaq oqarpoq nangillunilu.
- Tassa Air Greenland akitsueqqinnavianngilaq. Ukiorpassuarnimi akikilliliiniartuarsimanerput attatissavarput.
2021-mi sinneqartooruteqaqqinissaq naatsorsuutigineqartoq
Corona nunarsuarmi siorna martsimi tuniluutilermat, tamanna qaammatinik pingasunik sivisussuseqassasoq aqutsisut naatsorsuutigeqqaarsimavaat. Ukiorli ataaseq qaangiutereersoq silaannarmi timmisartuussinermut suli killilersuisoqarpoq. Tamanna Air Greenlandip nunanut allanut angallassisarneranut sunniuteqarpoq.
Timmisartuussineq 2021-mi suli sunniivigineqaqqassasoq coronamillu tuniluuttoqalinnginnerani ilaasartunit ikinnerusunik ilaasoqartassasoq naatsorsuutigineqarpoq. Air Greenlandimi aqutsisut akileraannginnermi 30-40 millionit koruuninik sinneqartooruteqarnissaq naatsorsuutigigaat, naatsorsuutini allaqqavoq.
AAMMA ATUARUK Peter Grønvold Air Greenland siulersuisuinit aamma tunuartoq
- Ukiumi angalaffiviulluartartumi angallassilluarnissarput naatsorsuutigigaluarparput, tamannali ilimanarunnaarpoq. Taamaattumik naatsorsuutitsinniit kaaviaartitakinnerunissarput ilimagaarput, Jacob Nitter Sørensen oqarpoq itisiliillunilu:
- Taamaakkaluartoq piffissami qanittumi isertitsiffissagut annertusarneqarsinnaalissapput, taamaattumik kaaviiartitaqarnerunissarput naatsorsuutigisinnaavarput. Taamaammat 30-40 millionit koruuninik sinneqartooruteqarnissarput naatsorsuutigaarput.
