Nunatsinni silaannakkut angallanneq matuneqarmat: Soorlu naakkut tillutsilluni

Air Greenlandip pisortaa, Jacob Nitter timmisartuutileqatigiiffiit pisortaasa nunarsuaq tamakkerlugu ernumassutigisaat pillugu siorna marsip ulluisa 17-ianni sianerfigineqarpoq.

Sianernerummi ataasinnguup sapaatit akunnerini marlunni tulliuttuni timmisartuussinernik tamanik unitsitsisoqarnissaanik kinguneqarpoq.

- Susoqarnera kimilluunniit ilisimaneqanngilaq, sianerfigineqarataarpungalu. Timmisartuussinerit tamarmik unitsittussanngorpagut, erngerlutalu taamaaliorpugut, pisortaq eqqaamasaminik oqaluttuarpoq.

Ulluni makkunani timmisartut aatsaat siullermeertumik nunamiitsiinnarneqarnissaanut peqqussuteqarnermi ukioq ataaseq qaangiuppoq. Coronavirusimik tunillatsissimasumik nunatsinniiittumik siullermeertumik uppernarsaasoqarnerata kinguneratigut tamanna pivoq.

Sianertoqarnerata kingorna akunnerpaaluit paatsiveerusimaangaatsiartoqarpoq.

- Taava eqqarsaatigilerparput nunappassuit sumiiffimmi kukkusumiittut. Kalaallinik Danmarkimiittunik angerlarusuttoqarpoq, aamma danskinik nunamilu allamiunik nunatsinnit aallarusuttoqarpoq, Jacob Nitter oqarpoq.

Pisortaq atuisartunit toqqaananrtumik attaveqarfigineqartoq

Pisortap oqarasuaataa ullormi tassani kingusinnerusukkut sianeqqippoq. Timmisartuutileqatigiiffik marsip ulluisa 18-ianni 19-iannilu timmisartuussiinnartussanngorpoq, taamaalillutik aallarneq ajuleqqasut ingerlaqqissinnaaniassammata.

- Timmisartuussinissamut pilersaarutit tamarmik taamaatiinnarneqarnerisa kinguneratigut atulerseqqinnissaat suliarujussuuvoq. Ilaasussat ilaaginnarusunnersut paasiniarlugu sianeqattaartariaqarpugut. Inunnit sianerfigineqaqattaarpugut. Jacob Nitter eqqamasani pillugit oqarpoq.

- Amerlasuut angalanissaminnut billetseqanngitsut tassanngaannartumik aallarnialerput. Uanga nammineq Messengera inunnit billetserserusuttunit allagarsiassarpassuarnik ulikkaarpoq.

AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut

Timmisartuutileqatigiiffimmi ulapputtoqangaatsiarnera pissutigalugu pisortaq nammineerluni suliffiup billetsinik tuniniaavittaani kiffartuussinertaanilu sulisut timmisartumut kingullermut ilaasussanut sianeqattaarneranni ikiuuttariaqarsimavoq.

- Ikiuussinnaasut tamarmik ikiuupput. Taamaammat unnukkut pizzarpassuarnik nerisoqartarpoq, Jacob Nitter oqarpoq.

- Taama pisoqarsinnaaneranut imminut piareersalaareernikuugaluarlunga pisorli takkummat allaanngilaq naakkut tillutsilluni.

Timmisartuussinikinnerit soraarsitsinerpassuillu

Siullermik matusisoqarmat ullut 14-it qaangiunneranni ammaqqinnissaq siunertagaluarpoq. Taamaattoqanngilarli. Aatsaat juunip qeqqani arriitsumik ammaqqikkiartortoqalerpoq, ilaasulli taamaallaat 600-kkaarsinnaallutik.

Piffissallu taassuma tungaanut Air Greenland oqartussanut timmisartuussinernik taaneqarsinnaasunik ingerlataqarpoq, assersuutigalugu peqqinnissaqarfimmi sulisunik nunatsinnut nunatsinniillu ingerlatsinissamut. Piffissarli timmisartuutileqatigiiffimmut ilungersunarluinnarsimavoq, tamannalu piffissaq tamakkerlugu atorfinnik 100-nik atorunnaarsitsisariaqarnermik kinguneqarsimalluni.

Tamanna suli malugineqarsinnaasoq, pisortaq erseqqissaavoq:

- Allaffissornermi suliaqartut maluginerpaavaat. Akissarsiaqartitsinissat ukiumullu naatsorsuutit suli suliarineqartussaapput, taakkuninngalu suliaqartut ikinnerupput. Amerlasuut ukiumi kingullemri ulapingaatsiarput.

AAMMA ATUARUK Air Greenland: Billettit tamaasa utertissavagut

Maannakkutut isikkoqarallartillugu atorfiit atorunnaarsinneqarsimasut qanittumi inuttassarsiuteqqinnissaat pilersaarutigineqanngilaq. Atorfinnilli allanik coronap ilungersuatitsinera pissutigalugu atorunnaarsitseqqinnissaq aamma pilersaarutaanngitsoq pisortap erseqqissaatigaa.

Nunatsinnut silaannakkut angallanneq siorna aasaanerani ammaqqippoq. Tamanna decembarip ulluisa 30-ata tungaanut atuuppoq, pisortarmi timmisartut nunamiileqqinnissaat pillugu oqartussanit sianerfigineqaqqippoq.

Taakku suli nunamiiginnarput, tamannalu apriilip ulluisa 18-iata tungaanuugallartoq atuutissapput.