Air Greenland 30,6 millioninik sinneqartooruteqartoq

Coronaqarnerani ukioq 2020 pisoqarfiungaatsiartoq Air Greenlandip 30,6 millioninik sinneqartooruteqarfigaa,

Timmisartuutileqatigiiffik tusagassiuutinut taama nalunaaruteqarpoq.

Angusat Air Greenlandip missingersuutaanit 48 millionit koruuninik annikinnerupput.

Angallannermut killilersuinerit taamatullu covid-19 pissutigalugu angallattukinnerunera toqqaannartumik tamatumanik kinguneqartut, timmisartuutileqatigiiffik paasissutissiivoq.

Siulersuisunut siulittaasup, Bodil Marie Damgaardip nunarsuarmi tamarmi angallannermi takornariaqarnermilu pissutsit immikkut ittut tunngavigalugit angusat naammagisimaarpai.

- Air Greenlandip Covid-19 pissutigalugu ukioq 2020 tamaat angalasoqanngingajannera misigaa.

- Sinneqartoorneranullu peqqutaalluinnarput 2020-mi maajimi piffissaq eqqorlugu timmisartuussinissanik nalimmassaaneq, siulersuisunut siulittaasoq oqarpoq.

AAMMA ATUARUK Air Greenland om nedlukning: Slaget er ikke nær så hårdt, som i foråret

Nalimmassaanerit allatut oqaatigalugu tassaapput sulisut 75-init 100-nut, matumani piffissaq tamakkerlugu sulisut 60-it ilanngullugit atorfiisa atorunnaarsinneqarnerat.

Air Greenland Namminersorlutik Oqartussanut oqartussat timmisartuussinerannik marsimit juunimut ingerlatsinissamik isumaqatigiissuteqarnikuuvoq.

- Isumaqatigiissuteqarsimanngikkuttami 2020-mi millioninik qulikkaanik arlalinnik amigartooruteqarsimassagaluarpugut, Bodil Marie Damgaard oqarpoq.

- Ukiuni tulliuttuni timmisartuutinik taarsersuinissamik pisariaqarluinnartumik pilersaaruteqarneq piviusunngortinniarlugu, taakku aningaasalersussagutsigit ukiuni tulliuttuni suli pitsaasumik patajaatsumillu angusaqarissaartuarnissaq pisariaqarluinnarpoq. Taamaattumik ukiuni tulliuttuni piginnaasanik aqutsilluarneq atuisunullu sammisunik suliniuteqarnermut aningaasaliisarnissaq ingerlatsiviup suliassarai pingaarnerit, siulersuisunut siulitttaasoq, Bodil Marie Damgaard oqarpoq.