Air Greenland Qaqortumi mittarfiup naalinissaa pillugu: Uatsinnut sunniuteqarnavianngilaq
- Qaqortumi mittarfissaq naannerulissagaluarpat Air Greenlandip Qaqortumut siunissami sullissinissaminut pilersaarutaanut sunniuteqarnavianngilaq.
Air Greenlandip pisortaa, Jacob Nitter Sørensen oqarpoq.
Mittarfiliortiterneq
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Namminersorlutik Oqartussat ingerlatseqatigiiffiata, Kalaallit Airportsip Qaqortumi nutaamik mittarfiliornissamut suliariumannittussarsiuussineq aggustimi taamaatiinnarpaa.
AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq
Ingerlatseqatigiiffinnit tallimanit neqerooruteqartoqaraluarpoq. Neqeroorutilli tamarmik Kalaallit Airportsip missingersuutaanit qaffasinnerungaatsiarput. Qanorli qaffasinnerutiginersoq, suliniutinut pisortap, Aviaaja Knudsenip paasissutissiissutigerusunngilaa.
Kalaallit Airportsip siulersuisuini siulittaasoq aalajangiisussaaguni suliariumannittussarsiuussinermik nutaamik mittarfimmut siusinnerusukkut suliariumannittussarsiuunneqartumik mikinerusumut suliariumannittussarsiuussisoqassaaq.
Mittarfiup 1.199 meteriusup sananeqarnissaa 1.500 meterimit piviusorsiornerussasoq, Kalaallit Airportsimi siulersuisuni siulittaasuusimasup, Jóhannus Egholm Hansenip Namminersorlutik Oqartussat maajip qammataani mailikkut allaffigai. Tamanna Sermitsiaq.AG-p mailikkut allagaatinik takunnissimasup allaaserisaa.
Air Greenlandip atlantikoq qulaallugu timmisartui missinnaanavianngillat
Borgmesterip, Kiista P. Isaksenip (Siumut) mittarfiup naalineqarniarnera kamaatigaa. Mittarfilli 300 meterinik naannerugaluarpat tamanna Air Greenlandimut allannguuteqarnavianngitsoq, Air Greenlandip pisortaa oqarpoq.
Taassuma nunap iluani timmisartuussissutitik, dash-8-t mittarfinnut naannerpaamik 799 meterisut takissuseqartunut missinnaasut nassuiaatigaa. Assersuutigalugu Nuummi mittarfik 950 meterisut takissuseqarpoq.
AAMMA ATUARUK Tusagassiuut: Qaqortumi mittarfissaq ilimagisamit naannerussaaq
Qaqortumi mittarfissap naalineqarnissaa atlantikoq qulaallugu timmisartuussisarnerminnut aamma sunniuteqarnaviannginnerarpaa. Timmisartorsuarmi 1.500 meterisut takissuseqartumut missinnaanngilaq.
-Mittarfik 1.500 meteri atorlugu Europamut toqqaannartumik timmisartuussisoqarsinnaangimmat allamik periuseqarnissaq qinernikuuarput, taamaamat mittarfik pilersaarutaasumit naannerugaluarpalluunniit Air Greenland-imut sunniuteqarnavianngilaq.
Borgmesteri isumaqataanngitsoq
Kommune Kujallermi borgmesterip, Kiista P. Isaksenip (Siumut) Qaqortumi mittarfissap 1.500 meteriunissaa pillugu Inatsisartut Naalakkersuisullu imaaliallaannarlugu allanngortinneqarsinnaanngitsumik aalajangeereernikuummata aalajangiusimavaa,
Taassuma mittarfiup atlantikoq qulaallugu siunissami mittarfiulersinnaaneranik ilaatigut tunngavilersorpaa.
- Atlantikup avannarpasissuani mittarfik, uani nunanut allanut attaveqarniarnermi periarfissaasinnaasoq, aammalu allilereqqinnerit massakkut mittarfeqarfiit allat qiviarutsigit takusinnaavarput sumut ingerlasoqarnersoq.
AAMMA ATUARUK Naalakkersuisoq neriorsuisoq: Qaqortoq mittarfittaassaaq
Taamaammat Kommune Kujallermit Nuummut mittarfik pillugu oqaloqatiginnikkiartortoqarnissaanut pilersaaruteqarpoq.
- Naalakkersuisunik arlalinnik oqaloqateqartussaavugut, Aningaasaqarnermut ataatsimiitsitaliaq naapittussaavarput, taavalu aamma inatsisartuni ilaasortat naapeqatiginissaannut pilersaaruteqarluta, tamatumalu saniatigut amma Kalaallit Airports-imut oqaloqatiginninnissaq aamma pilersaarutaavoq, Kiista P. Isaksen oqarpoq.
Qaqortumi mittarfissaq 1.500 meterisut takissuseqassanersoq 1.199 meteriussanersorluunniit Naalakkersuisut aalajangertussaavaat. Tamannali suli aalajangiiffigineqanngilaq. Naalakkersuisut mittarfimmik sanaartornissamut qaartitsineq siulleq aggustip qaammataani pinissaa suliariumannittussarsiuussinerup taamaatinneqannginneranili naatsorsuutigigaluarpaat.
