Naalakkersuisoq neriorsuisoq: Qaqortoq mittarfittaassaaq
- Soorunami 2023-imi mittarfeqalernissaa piunnanngilaq.
Attaveqaqatigiinnermut naalakkersuisoq, Siumumeersoq Karl Frederik Danielsen KNR-imut taama oqarpoq.
Taassuma Qaqortumi mittarfiliornissap taamaatiinnarneqarallarnera pillugu Kalaallit Airports naapinniarpaa.
AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq
- Kalaallit Airports neqeroortitsineq ingerlammassuk, oqaloqatigiinneq ingerlassaaq. Qaqagu neqeroortitsineq naammassissanersoq Qaqortulu mittarfissaa qaqagu aallartissanersoq oqaloqatigiinnerup kingunerisaanik qulakkeerneqassaaq.
Mittarfiliortiterneq
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Kalaallit Airportsip, Namminersorlutik Oqartussanit pigineqartup, Qaqortumi mittarfiliornissamut suliariumannittussarsiuussinini taamaatiinnarpaa.
Suliariumannillutik ingerlatsiviit assigiinngitsut tallimat neqerooruteqarsimagaluarput, kisianni Kalaallit Airportsip missingersuutaannut naleqqiullugit tamarmik akisuallaarsimapput.
Sipaarniarneq anguniarlugu Kalaallit Airports taakkunani ingerlatsiveqatigiinnut marlunnut isumaqatigiissusiorniarsimagaluarpoq, Namminesorlutik Oqartussanullu aningaasaliiffigeqqinneqarnissartik neriuutigalugu aamma saaffiginnissimagaluarlutik.
Kisianni iluatsinngilaq, Qaqortumilu mittarfiliornissamut suliariumannittussarsiuussinertik Kalaallit Airportsip aappaagu ingerlateqqinniarpaa.
Qaqortoq mittarfittaassaaq
Kommune Kujallermi borgmesterip Kiista P. Isaksenip Sulisitsisullu Qaqortumi immikkoortortaqarfianni siulittaasup tulliata, Jim Riisip mittarfimmik sanaartornissap suliarinnittussarsiuunneqarunnaarnera kamaatigalugulu pakatsissutigingaarpaat.
Attaveqaqatigiinnermulli naalakkersuisup Qaqortumi mittarfeqalernissaa neriorsuutigaa, kisianni pilersaarutit allanngortariaqarput.
Qaqortoq mittarfittaassua?
- Qaqortumi mittarfeqalissaaq, aap. Kisianni qaqagu neqeroortitsineqassanersoq qanorlu neqeroortitsisoqassanersoq apeqqutaassaaq.
AAMMA ATUARUK Sulisitsisut suliariumannittussarsiuussinerup taamaatiinnarneqarnera kamaatigaa: Tillutsittutut misigisimanarpoq
Kalaallit Airportsilu isumaqatigiissusiorniarluni naapeqatigiinnissaq tullernguuttoq.
Naalakkersuisut Kalaallit Airportsimut pitsaanerusumik aappaagu suliariumannittussarsiussisoqarnissaa pillugu aningaasaliinerussanersut Karl Frederik Danielsenip oqaatigisinnaanngilaa.
Kalaallit Airportsimik ataatsimeeqateqaqqaassaaq.
- Naalakkersuisut Ilulissani, Nuummi Qaqortumilu mittarfiliornissaat Inatsisartut inatsiseq 2018-imi akuerisaanni inatsisiliortoqarnikuuvoq. Tamatumunngalu tunngatillugu Qaqortumi mittarfeqalernissa pinngitsoornagu anguniarlugu Naalakkersuisuni ingerlavugut. Kisianni inuiaqatigiit aningaasaataat iluamik paaralugit ingerlasussaavugut.
Aggustimi qaartitsisoqartussaagaluartoq
Mittarfiliornissap taamaatiinnarneqarnera Qaqortumi pakatsissutigineqangaarpoq.
Kommune Kujallermi borgmesterip tullersortaa siulleq, Simon Simonsen (Siumut) naapertorlugu, pilersaarutit malillugit Qaqortumi mittarfiliornissaq Naalakkersuisunit juunimi neriorsorneqarsimalluni oqarpoq.
- Ajoraluartumik nassuerutigisariaqarpara Naalakkersuisunut tatiginnikkunnaarlunga, Simon Simonsen tusagassiuutinut nalunaarummi tallimanngormat oqarpoq.
Tamanna pillugu Karl Frederik Danielsen ima nassiuaavoq:
- Naalakkersuisut siulittaasuallu, aasaq kujataaniippugut: Simon Simonsinnikkut kommunalbestyrelsemi ilaasortallu taamanikkut naapippagut. Tassanilu uagutsinninngaanniit oqaatigineqarpoq, Kalaallit Airportip neqeroortitsineq naammassinngimmagu, kisitsillu naammassinngimmagit taamanikkut suli paasisimanngilarput.
- Naatsorsuutiginikuugaluarparput pinngitsoornani qaartitsineq siulleq aggustimi ingerlasssasoq. Kisianni taassuma kingorna imatut pisoqartoq massakkut erserpoq – aki qaffasippallaarujussuarmat neqeroortitsineq unitsittariaqarsimavoq.
