Air Greenland mingutsitsinnginnerulerniartoq, kisianni timmisartuussinerit ilaannaanni

Kangerlussuup Københavnillu akornanni timmisartumut ilaaninni ilerasuutikinnerulaarsinnaavutit.

Air Greenlandip tamanna oqaatigaa.

Timmisartuutileqatigiiffiummi DCC aamma Shell Aviation Denmark suleqatigalugit timmisartorsuarmut orsussap 5 procentiata Sustainable Aviation Fueliulernissaa (SAF) isumaqatigiissutigaat. Orsussaq taanna uumassusillit igitassartaannit 100 procentimik sanaajuvoq. Taakku tusagassiuutinut nalunaarummi allapput.

Isumaqatigiissummi Air Greenlandip nunatta iluani timmisartuussisarneranut atuutinngilaq.

Orsussaq taanna Air Greenlandip pisortaanerata, Jacob Nitter Sørensenip oqarnera naapertorlugu akisunerugaluarluni naleqarluarpoq:

- Silaannakkut angallannermi mingutsitsinnginnerunermik ingerlatseqataarusunnerput kisianni aamma nunatta nungusaataanngitsumik atuiffinngornissaanut pissutigalugu taama iliorpugut.

Air Greenlandip tuniniaasartuminut isumaqatigiissutigisani isumaqatigiissutitsialaasorigaa, orsussallu SAF-ip akia siunissami piumaneqaleraluttuinnarnera pissutigalugu akikilliartorumaartoq isumaqartoq, Jacob Nitter Sørensenip erseqqissaatigaa.

5 procentit qanoq iluaqutaassappat?

Timmisartut EU-p killeqarfiani angallassisartut orsussamik SAF-imik minnerpaamik 2 procentimik atuisarnissaat EU-mi 2022-mi atulersinneqarpoq.

Air Greenlandip atlantikoq qulaallugu timmisartuussissutertaava, Tuukkaq angalaqqaarneranit qaammatialuinnaat qaangiupput, taassumalu orsussaq nungusaataanngitsoq, EU-mit minnerpaamik innersuussutigineqartumit annertunerusoq atussavaa.

Orsussalli nungusaataanngitsup 5 procentiunera mingutsitsinngitsutut taaneqarsinnaava?

Jacob Nitter Sørensenip inuit tamatuma annertorpalunnginneranik eqqarsarsinnaanerat paasisinnaaneraa KNR-ip aperaa, taassumalu paasisinnaalluarpaa:

- Aap, tunngaviusumik. Piffissami ingerlanerani 100 procentip tungaanut ingerlaassaagut. Kisianni 5 procenti annertoorujussuuvoq. Aamma EU-p minnerpaamik 2 procentimik piumasaqarneratigut erserpoq, taanna nassuiaavoq.

Nunap iluani timmisartuussinerni nungusaataanngitsoqassanngitsoq

Timmisartorsuaq nutaaq qangatariarluni Danmarkimut EU-p ilaanut mikkami EU-p orsussap qanoq mingutsitsinngitsuunissaanut malittarisassaanut erngertumik malinnittussanngorpoq.

Air Greenlandip nunatta iluani timmisartuussissusaani taamaanngilaq, taakkumi nunarput qimanneq ajorpaat.

Nunattali iluani timmisartuussissutit isumaqatigiissummut matumani ilaannginneranut tamanna pissutaanngitsoq, Jacob Nitter Sørensen erseqqissaavoq:

- SAF-ip timmisartuni anginerusuni, annertunerusumik orsussamik atuisartuni maannakkut atorneqarnissaa sunniuteqarnerussaaq, taanna nassuiaavoq.

Taassumalu nunatsinni SAF-ip piffissap ingerlanerani tunisassiarineqarsinnaalernissaa taamaalillunilu nunatta iluani timmisartuussinernut periarfissaalernissaa neriuutigaa.

Atlantikoq qulaallugu timmisartuussissut Tuukkaq orsussamik SAF-imik 50 procentimik atuisinnaanissamut ullumikkut akuersissuteqarpoq. Air Greenlandillu tamanna piffissap sivikitsup ingerlanerani 100 procentiulernissaa naatsorsuutigaa.