Nuummi angut kinaassusersineqanngitsoq ministeriunerup timmisartuanut ikisoq

Angut timmisartoqarfimmi isumannaallisaavik aqqusaareerlugu sulisunit ministeriunerup timmisartuutaanukaanneqarami timmisartumut tallimanngornermi unnukkut ikivoq. Ajornartorsiulli unaavoq: Angut timmisartumut tassunga ilaasussaanngivippoq.

Allattoq Christine Hyldal, Nicole Sander Bertelsen, Ann-Sophie Greve Møller

januaarip 28-at 2026 09:59

Nutserisoq Medea Olsen, Tabetha Kreutzmann

Nuup mittarfiani tallimanngornermi unnukkut eqqumiitsumik pisoqarpoq.

Ministeriuneq Mette Frederiksen Nuummeereerluni Danmarkimut utertussanngormat, timmisartoq qangattarnissaminut piareersimavoq. Angulli ministeriunerup aallarnissaa sioqqullugu mittarfiup illorsuanut takkuppoq, ministeriunerullu timmisartussaanut ilaasussaanerarluni.

Tusarfiit assigiinngitsut pingasut KNR-imut taama oqarput. Tusarfiit kinaassutsitik isertuukkumavaat, tamannalu KNR-imit akuerineqarpoq.

Angut kinaassutsiminut uppernarsaateqarnani arlaannilluunniit uppernarsaataasinnaasunik allanik tigummiaqanngikkaluarluni, isumannaallisaavik aqqusaarpaa sulisuniillu tamatuma kingorna timmisartuliaanneqarpoq.

Politiinit qimagutitinneqartoq

Angut timmisartumut ikigami puussiamik nassataqarpoq, KNR-illu tusarliisui naapertorlugit nassataasiviit passuppai. Angut timmisartumit aatsaat tassani qimagutitinneqarpoq politiiniillu allamukaanneqarluni.

Timmisartoq alla Nuummut aggersarneqarmat ministeriuneq Danmarkimut tallimanngornerup unnuaani nalunaaqutaq pingasut missaanni uterpoq.

Angut qanoq ililluni isumannaallisaavik aqqusaarlugu anillassinnaasimanersoq, timmisartoqarfimmilu sulisunit ministeriunerup timmisartuutaanukaanneqarsinnaasimanersoq, KNR oqartussaasunut assigiinngitsunut pingasunut apeqquteqarpoq.

Pisoqarsimanera Greenland Airportsimit uppernarsarneqarpoq, pisorli pillugu oqaaseqarusunnginnamik Kalaallit Nunaanni Politiinut innersuussipput.

Kalaallit Nunaanni Politiit mailikkut KNR-imut ima allapput: "Kalaallit Nunaanni Politiit Nuummi mittarfimmi pisumut ornigupput, tassungalu atatillugu mittarfinni oqartussat oqaloqatigineqarput. Mittarfinni pisut isumannaallisaaneq eqqarsaatigalugu oqaaseqarfigineq ajorpagut. Kalaallit Nunaanni Politiit maannamut allamik oqaaseqarsinnaanngillat."

Angallannermut Aqutsisoqarfik KNR-ip saaffiginninneranut suli akissuteqanngilaq.

Ministeriuneqarfimmit oqaaseqartoqarusunngilaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.