Tuukkaq ilaasunut internettimut attaveqaateqarpoq, ilaasullu kuffertiinu anginerusunut inissaqartitsilluni.Assi: Air Greenland

Air Greenlandip timmisartorsua nutaaq Tuukkaq nunatsinnukangajalersoq

Nunatta timmisartortaarsua nutaaq Tuukkaq nunatsinnut aqagu nalunaaqutaq ataatsimut meqqaassaaq.

Nunatta mittarfissuartaarnissaanut atatillugu timmisartorsuarmik nutaamik Airbus A330-800neo-mik nunarput timmisartuutitaarpoq.

Taanna Tuukkamik ateqarpoq. Tuukkaq tassaavoq qanga kalaallit piniagassanut sakkutut atortagaat.

Timmisartuliorfiup timmisartorsuaq Airbus A330-neo nutaaq Toulousemi Frankrigimiittumi malunnartitsinikkut Air Greenlandimut ullumikkut marlunngornermi malunnartitsinikkut tunniuppaa.

Air Greenland tusagassiuutinut nalunaarummi taama allapput.

Tuukkaq siullermeerluni nunatsinnukarluni aqagu pingasunngornermi tingissaaq.

Tuukkap nunatsinnut angalaqqaarneranut atatillugu Naalakkersuisut siulittaasuat, Múte B. Egede, immikkut qaaqqusatut ilaaqataaqqaassaaq.

Taanna ilaatigut tusagassiuutinut ima nalunaaruteqarpoq:

- Suliami matumani suleqataasimasut tamaasa qutsavigiumavakka. Isumassarsiamit siullermiit ullumikkumut - timmisartoq kusanarluinnarlunilu nutaaliaasoq, pingaarnertullu, timmisartoq mingutsitsinikinnerusoq.

Tuukkaq pillugu:

 

305-inik ilaasoqarsinnaavoq, issiaviit akisunerusut 42-t akikinnerillu 263-it.
 

Arfineq marlunnik perusuersartarfeqarpoq.
 

Timmisartumi ilaasut WiFi-kkut internetimut attaveqarsinnaapput.
 

Ilaasunut ataasiakkaanut uuttortarlugu ikummatissaq atortagaa CO2-mik anitsitsinera 25 procentimik annikinneruvoq.

- Tuukkaq pinngortitamut eriaginnilluni aningaasaliinermut aqqutissiuivoq - kinguaariinnullu tulliuttunut aamma pitsaasumik aningaasaliineruvoq, Naalakkersuisut siulittaasuat oqarpoq.

Tuukkaq nunat tamalaat akornanni timmisartuussisinnaavoq. Norsamiit angineruvoq, 305-inik ilaasoqarsinnaavoq, orsussamillu atuinikinnerullunilu mingutsitsinnginnerussasoq, Air Greenlandimi pisortaaneq, Jacob Nitter Sørensen oqarpoq.

- Kalaallit Nunaata piujuaannartitsinissaq tunngavigalugu angalaffissatut anguniagaqarnera tapersersorparput. Air Greenlandip timmisartuutileqatigiiffinni Europamiittuni siulliit ilaanniilluni timmisartuussisarnermi mingutsitsinnginnissaq anguniarlugu allannguinera tulluusimaarutigaara, Jacob Nitter Sørensen A330-800neo-mik toqqaasimaneq pillugu itisiliivoq.

Tuukkaq pilersaarutit malillugit Kangerlussuarmut nalunaaqutaq ataatsimut missaaq. Tamatumalu kingorna Air Greenlandip hangariani nunaqarfiup innutaasuinut kaffillernikkut persuarsiutigineqassalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl