Air Greenland AWG-ertussat pillugit isumaqatigiissusiunngitsoornermut: Timersoqatigiit Kattuffiat akissaalatsisoorpoq

Allamik timmisartorsuartaarneq sivisunerusumillu timmisartuussisalerneq Timersoqatigiit Kattuffiata Arctic Winter Gameseriartussat toqqaannartumik timmisartuunneqarnissaannut ukioq manna akissaalatsisoorneranut pissutaapput.

Tuukkaq alakkarterparput suleqatigiilluta. Anoraa nillikujuppoq, ullup ingerlanerani kiatsilaariartuaaq

Allattoq Hanna Vestergaard Hviid

januaarip 24-at 2024 14:19

Nutserisoq Hanne Petersen

Arctic Winter Gamesertoqangajalivippoq (AWG). Timersortartorpaalussummi Issittumeersut unammiuaarlutik marsip qulingani aallartissapput.

Nunatsinneersulli ukioq manna AWG-eeqataanissaannik aaqqissuussiniarneq Timersoqatigiit Kattuffiannut imaannaasimanngilaq.

Ilaatigummi Timersoqatigiiffiit Kattuffiat Air Greenlandilu AWG-eeriartussat Kangerlussuarmiit Alaskamut toqqaannartumik timmisartuunneqarnissaannik isumaqatigiissusiunngitsoorput. Siorna AWG-ertoqartussanngormat, nunatsinneersut Canadamut toqqaannartumik timmisartuunneqarput.

ARCTIC WINTER GAMES 2024

Arctic Winter Games 2024 USA-mi Alaskap ilaani Mat-Su-mi marsip qulinganiit 16-iat ilanngullugu ingerlanneqassaaq.

Timersortartut nunatsinneersut 48-it ukioq manna unammiartussapput, timersuutillu Arctic Sports, sulorarneq, ujakkaarneq, Dene Games aamma Snowboard peqataaffigineqassapput.

Taassuma saniatigut nunatta kulturikkut takutitassaanut inuusuttut arfinillit peqataatinneqassapput.

Nunatta peqataanerata saniatigut allat peqataatitaqartussat tassaapput Alaska, Albertha North, Northwest Territories, Nunavik-Quebec, Nunavut, Sápmi aamma Yukon.

Nunarput 2023-mi unammiuaartoqarnerani katillugit 85-inik ujaminnappoq. Guldit 38-t, sølvit 23-t bronzellu 24-t.

Allisiguk

Timmisartuunneqarnissaannullu akigititaasoq matumani pissutaavoq. Air Greenlandimiimmi toqqaannartumik timmisartuunneqarnissaq nunatsinniit Islandimut timmisartuunneqariarlutik tassannga Seatlle aqqusaariarlugu Alaskami Anchoragemut timmisartuunneqarnissaaninngarnit akisunerusoq, Timersoqatigiit Kattuffiat ilisimatitsivoq.

AWG-eriartussalli Tuukkap ulikkaarnissaanut ikippallaartussaassanerat tamatumunnga pissutaasoq, Air Greenland KNR-imut nassuiaavoq.

- Tuukkaq 305-inik ilaasoqarsinnaavoq, 120-niillu amerlanerunngitsunik timmisartuussinissaq Team Greenlandilu isumaqatiginninniutiginerani inummut ataatsimut agguaqatigiisillugu akigitinniagarput Timersoqatigiit Kattuffiata akisugivallaarlugu isumaqatigiinniaqatigiunnaarpaatigut, Air Greenland KNR-imut allappoq.

Air Greenlandip timmisartorsuarisimasaata, Norsap, siorna AWG-eriartussanik timmisartuussissutaasup ulikkaarnissaanut 278-inik ilaasoqarsinnaavoq.

Timersoqatigiiffiit ilaat peqataanngiinnassasut

Timersortartut inuusuttut ukioq manna AWG-eeqataasussat siornatigornit aamma ikinneroqaat.

Voleyballertartummi, nerrivimmi arsaarartartut nivissallu futsalertartut peqataanngiinnassapput. Sooq taamaatitsinersut aperigatsinni aamma akisugalugu peqataanngiinnarniarlutik aalajangersimallutik oqarput.

Aamma atuarukAWG-mut peqataasinnaajunnaartoqarnera Timersoqatigiit Kattuffiata uggoraa

Timersoqatigiiffiinni peqataanngiinnartussanngortuni marluk siorna AWG-eeqataanerminnut aningaasartuuteqangaatsiarsimammata ukioq manna peqataatitsinissaminnut akissaalatsipput.

- Unammisartuutitta angalatinnissaat uagutsinnut akisuallaarpoq. Kingullermik Arctic Winter Gamesimut peqataatitsigatta millionit affaangajaannik aningaasartuuteqarpugut, aningaasaqarnitsinnullu equsoortitsinikuuvoq. Taamaasilluta siulersuisuni oqaloqatigeereerluta ukioq manna peqataatitsiniarata aalajangerpugut, nunatsinni nerrivimmi arsaarartartut kattffiata Greenland Table Tennis Federationip siulittaasua Henrik Ottosen KNR-imut oqarpoq.

Tamannalu Timersoqatigiit Kattuffiata siulittaasuata, Claus Nielsenip, uggoraa.

- Uggornaraluaqaaq. Uggoraara kisianni tassa aningaasat soorunami apeqqutaagamik massakkut aamma akitsoraluttuinnarami peqataanissaq nunanut allanut aamma AWG-mut. Tapeeriaaseq ukiut pingasut sisamat qaangiupput specialforbundinut allanngortinneqarmat. Tassani specialforbundit namminneq akiligassaat amerligamik. Massakkut taamatut naleqarallarpoq. Ikiliartorput peqataasut, oqarpoq, taanna oqarpoq.

Timersortartut nunatsinneersut timersuutini assigiinngitsuni tallimani ukioq manna unammiuaqataasussat maannamut 48-pput.

Nutaarsiassami kukkunermik nassaarsimaguit uunga allaffigineqarsinnaavugut.