Agathe Fontaini imigassaq pillugu eqqartueqqikkumavoq
Peqqissutsimut Naalakkersuisoq, Agathe Fontain, sapaatip akunnerani kingullermi imigassaq pillugu ulluni marlunni sivisussuseqartunik isumasioqatigiinnernut qaaqqusivoq.
Immikkut ilisimasallit, suliamik ilinniarsimasut kattuffiillu isumasioqatigiinnermi katersuupput, inuiaqatigiinni annertuumik ajornartorsiutaasutut taaneqartoq qanoq pitsaanerusumik aaqqinneqarsinnaanersoq pillugu:
- Tamanna pisariaqarpoq ajornartorsiutaasormi annertoorujussuuvoq. Imigassamik atuinerup kingunipiluinik aningaasartuutigulluunniit eqqaaginnarlugit annertoorujussuupput aammalu inuit meeqqallumi eqqorneqartartut amerlapput, Peqqissutsimut Naalakkersuisoq Agathe Fontain oqarpoq nagillunilu:
- Taamaattumik ingerlatseriusiornissaq ilisimatuussutsikkut ilisimasat malillugit pisariaqarpoq, ingerlatseriusissaq taanna ilisimatusarnermit ilisimasanik sunniuteqarnerpaanik tunngaveqartariaqarpoq. Taamaattumik maannakkut ilisimatuussutsikkut saqqummiisoqarnissaa pingaaruteqarpoq, taamaalilluta ilisimasat tamakku atorlugit siunissami politikkikkut ilusilersuisinnaaniassagatta, Peqqissutsimut Naalakkersuisoq taama oqarpoq
Kingunerluuteqangaatsiarsinnaasut
Agathe Fontainip ilisimavaa angerlarsimaffinni imigassamik atuineq annikilliartortoq. Kisianni inuummut ataatsimut - aamma eqqaaniittunut - kingunerisinnaasai suli annertoorujussuusut, taanna isumaqarpoq:
- Inuit peqqinnanngitsunik ileqqullit ikinnerugaluartut kingunerisassai annertoorujussuupput. Meeqqanut sakkortuumik sunniuteqartarpoq, peqqissuttitsinnut aamma eqquisarnerat annertuvoq, inuiaqatigiinnullu sunniuteqartarnera initoorujussuuvoq, oqarpoq nangillunilu:
- Meerartavut pitsaanerusumik siunissaqartikkusukkutsigit ilisimatusaatit aallaavigalugit iliuuseqarnissaq pisariaqarpoq, tamannalu pinngitsoorsinnaanngilarput, taanna oqarpoq.
Politikkerit nunatsinni imigassaq pillugu iliuuseqarnialernarat siullerpaajunngilaq.
Siornatigut malittarisanik sukaterisoqartarlunilu allanngortitsisoqartarsimavoq - aamma Agathe Fontainimit aqunneqartumik.
Taamaattumik apeqqutigissallugu aamma tulluarpoq sooq politikkerit tamanna akuleruffigisariaqarneraat:
- Soorunami inuit ataasiakkaat qanoq imertarnissartik aalajangertarpaat. Kisianni aamma ilaqarput ajornartorsiutitik qaangerniarlugit ikiorneqartariaqartut, Agathe fontain oqarpoq nangillunilu
-Inuppassuaqarpoq imigassamik atuiunnaarsimanerup kinguneranik inuunerluttunik, taakkulu aamma ikioqqusarput. Taakkununnga ikiunissatsinnut periarfissagissaartitsigutta, kinguaariinnut pitsaasumik siunissaq qulakkeersinnaavarput.
Imigassaq tamanut sunniuteqartarpoq
Agathe Fontain meeqqanut tunngasumut uteqqiivoq.
Massa inuit kiffaanngissuseqarlutik toqqagassaqaraluartut, toqqagassani taakkunani atuineq allanut sunniuuteqarnerluttariaqanngilaq:
- Nalunngilarput meeqqat amerlasoorpassuit eqqugaasut. Ullumikkut meeqqat angerlarsimaffiup avataani inissinneqartartut amerlasoorpassuupput. Iliuuseqartariaqarpugut, tassami inuiaqatigiit nukittuumik pilersissagutsigit ajornartorsiut tamanna eqqartortariaqarparput, taanna oqarpoq.
Taamaattumik ulluni marlunni isumasioqatigiisitsinissaq, suliassaqarfimmi misissuinerit katersorneqarnissaannik tunngaveqarpoq, taamaa iliornikkut unammilligassat ataatsikkut suliarilerneqarsinnaaqqullugit:
- Isumaqarpunga siunissami partiit akornanni inuiaqatigiinnilu ataatsimut oqallisigineqartariaqartoq. Ullumikkut qanoq iliortarnerput allanngortinneqartariaqarlunilu naammaginanngilaq. Ukiut sisamakkaarlugit politikkimik allanngortitsisarnissaq pinnagu piffissami sivisuumi atuuttussamik aalajangiisoqarnissaanut isumaqatigiinniarnissaq pilersittariaqarparput, Peqqissutsimut Naalakkersuisoq Agathe Fontain taama oqarpoq.