Meeqqat ulluanni kujataani imigassat aalakoornartortallit pisiniarfinni matoqqapput
- Kommune Kujalleq suleqatigalugu aaliangerneqartoq tapersersorparput 1. juni Meeqqat ulluanni imigassat matoqqassapput.
Pisiffik Qaqortumiittup Facebookimi nittartakkamini sisamanngornermi taama allappoq.
Kujataani Pilersuisup, Brugsenip Pisiffiullu niuertarfiini imigassanik aalakoornartortalinnik ullumikkut pisisoqarsinnaanngilaq.
Nanortalimmi Najukkami ataatsimiitsitaliamiit qinnuteqartoqarneratigut imigassat aalakoornartut matoqqatinneqarput.
-Akissarsiffiunikuusarami, taava aalakkuttoqangaatsiartarluni. Meeqqat ullukkut nuannisariarlutik ilaannikkut ilanngui takorloornartaramik innartut tujormillutik. meeqqat ullorsiornertik naggasernerlukkaat. Taanna pissutigalugu qinnutiginikuuarput, meeqqat tujorminnginniassammata, ullortik malugilluarniassammassuk
Ataatsimiititaliami siulittaasuugallartoq Didda Isaksen KNR-imut taama oqarpoq.
Meeqqat ullorsiorneranni aalakkuttoqartarnera Didda Iskasenip ukiut kingulliit ajornartorsiutaasarnerarpaa.
Angajoqqaat peqataassapput
Pilersuisup kujataani nunap immikkoortuata pisortaata Henriette Josefsenip meeqqat ulluanni juunip ulluisa aallaqqaataani aalakkuttoqartarnera ilisarisinnaalluarpaa.
-Meeqqanut tunngasuummat, taava meeqqanik tapersersuiniarluta kujataani Pilersuisup pisiniarfiini matoqqatitsinissarput akueralugu inissinnikuuarput, imalu nangilluni:
- Uani meeqqat ullorsiorneranni angajoqqaat amerlanerit peqataasinnaaniassammata. Tassani meeralluni misinnartarami angajoqqaanit ilagineqarluni ullorsioqatigineqarluni.
Meeqqat ulluanni kujataani pisiniarfiit imigassamik matoqqatitsinissaannik qinnuteqaatigineqartup akuerineqarnera, Nanortalimmi Najukkami ataatsimitsitaliami siulittaasuugallartup toqqissiallaatigaa.
-Ajunngilaq, iluaqaaq, aamma imerniartarfiit matoqqalerput maani Nanortalimmi, qujanartumik. Iluaq, toqqissisimanaq meeqqat qutsannaqaat.
Kujataani pisiniarfiit imigassanik aalakoornartortalinnik meeqqat ulluanni matoqqatitsisussanngornerat siunissami ileqqunngussasoq, Nanortalimmi Najukkami ataatsimiitsitaliami siulittaasuugallartup neriuutigaa.
