Meeqqat ulluat: Atuarfimmi ilikkagaqarnissaq pingaaruteqarpoq

Meeqqat ulluannut atatillugu meeqqanut Katuami sammisassaqartitsinermi KNR-imiit alakkaavugut, nuannersumillu meeraassagaanni suna pingaaruteqarnersoq naapitagut isumasiortillugit.
Allattoq Ane-Marie Petersen
juunip 01-at 2018 15:12

Qalipatsinneq, ballonginnanneq, tamulugassat peqqinnartut qisussuarmullu qalipaaqatigiinneq. Naak Nuummi sialuttalimmik anorersuaraluartoq Katuami meeqqanut aaqqissuussaq peqataasussaaleqinngilaq.

Nuannersumillu meeraassagaanni suut pisariqarnersut 14-inik ukiullip Sandra Heilmannip Ukaliusami atuartup nalornissutiginngilaa:

- Kammagiinneq, kisimiinnginnissaq. Kisimiikkaanni nuanniilliornarsinnaasarami allat kammagiit ilagiittut kiserliornarluni, Sandra Heilmann oqarpoq.

Qulinik ukiullip Ukaliusami atuartup Pakkutaq Egedep ullaakkut iteraangami atuariartornissaminut erinisuttarnerarpoq.

- Atuariartornissara erinigisarpara. Atuarfimmi assigiinngitsunik suliaqartaratta, Pakkutaq Egede oqarpoq.

Randi Kreutzmannip aqqaneq-marlunnik ukiullip atuarfik aamma pingaaruteqarnerarpaa.

- Atuarnissaq. Matematikkimi suliaqarluta gang-errajunnik nuannaraara.

Atuarfimmilu ikinngutisimaarnissani aamma erinigisarnerarpaa.

- Aneertarpugut putorluta rundboldiluunniit, Randi Kreutzmann oqarpoq.

Atuaqataata aamma atuarneq pingaartilluinnarpaa:

- Atuarneq. Ilikkagaqarnarami eqqarsarluarsinnaalertarami, Ane Anna Jensen oqarpoq.

Aamma atuaruk