Ærø Efterskolep atuartuuneq nunatsinneersunut nuannernerulersinniaraa

Efterskolileriarlaajuneq imaannaanngissinnaavoq. Ingammik angerlarsimaffik, ilaquttat, oqaatsit, pinngortitaq nerisassallu ilisimaarisatik qimallugit 3200 kilometerit missarluinnaanik ungasitsigisumut nuullutik efterskolerianut.

10. klassertuunerli nunatsinneersunut toqqissisimanarnerulersinniarlugu nuannernerulersinniarlugulu, Danmarkimi Ærø Efterskole tamatumunnga iliuuseqarniarpoq.

- Kalaallit Nunaanniit Danmarkimi efterskoleriat nuannisarnerunissaannik qularnaarinissarput efterskolet allallu pikkoriffigivallaarpasinngilarput.

Ærø Efterskolep pisortarigallagaa, Lasse Bøgeskov, taama oqarpoq.

Ærø Efterskole Fynip kujasissuaniittuusoq atuartunut 50-60-it missaannut inissaqartitsivoq. Efterskole taanna Danmarkimi efterskolet allat assigalugit atuartitsissutinik ukiuni kingullerni marlunni toqqagassaqartitsisarpoq.

Tassani ukiuni atuarfiusuni kingullerni marlunni efterskolertut pingasunik sisamanilluunniit nunatsinneersortaqartarput. Tamannalu nuannaarutigigitsik, Lasse Bøgeskov oqarpoq.

Ærø Efterskole atuartitsissutinik assigiinngitsorpaalunnik toqqagassaqartitsisarpoq, soorlu 'pissangartorsiornartumik angalaarneq aamma asimiinneq'. Assi © : Signe Ladegaard Jensen

Nunatsinniiilli tassunga efterskoleriartoqartaannaqqullugu taakkualu amerlaneruleqqullugit, Ærø Efterskole aningaasanik ukiunik atuarfiusussanik aaqqissuusseqqinnermut nunatsinneersuullunilu Danmarkimi efterskolernermi unamminartuusinnaasut iliuuseqarfiginissaannut atugassanik immikkoortitseqqippoq.

Aamma Maj Blazejewicz piukkunnartorsiugaareerluni Ærø Efterskolemi atorfinippoq. Taanna Galtrup Efterskolemi Jyllandip avannarpasissuani Morsemiittumi siornatigut ilinniartitsisuuvoq. 

Maj Blazejewiczimi Danmarkimi efterskolertuunerup nunatsinneersunut nuannernerulersinnissaanik Galtrup Efterskolemi ukiut qulit matuma siornali suliniuteqaleqataasunut ilaavoq.

Suliniullu taanna iluatsilluaqaaq. Galtrup Efterskolemimi ukioq manna atuartut 130-usut pingajorarterutaat sinnerlugit, tassa 56-it nunatsinneersuupput.

- Angusarissaartut ilikkagaqarluartullu, aammali ingerlalluartut, amerlipput angerlarsertartullu ikilillutik, aamma taamaatiinnarnikortaqanngillat, Galtrup Efterskolemi ukiuni 14-ini sulereerluni Ærø Efterskolemi ukioq manna ilinniartitsisuulersussaq Maj Blazejewicz oqarpoq.

Angajoqqaarsiaatigissasoq misilitsiffiussanngitsorlu

Ærø Efterskolep ukioq atuarfiusoq nutaaq aallartippat nunatsinniit Savalimmiuniillu Danmarkimut efterskolerianut angajoqqaarsiaatigisuusinnaanissaa allannguutaasussanut ilaavoq.

- Tassa sivisunerusumik ammasalissaaq, taamaammat sapaatit akunnerisa naaneranni feeriarfinnilu allamiittariaqartarunnaarsinnaalissapput, Lasse Bøgeskov oqarpoq.

Galtrup Efterskole qangalili taamaaliortalersimasuusoq Ærø Efterskolep taamaaliortalernissamik isumassarsivigaa. Galtrup Efterskoleli kisiat Ærø Efterskolep suleqatitaassartik Maj Blazejewicz ikiorsiullugu isumassarsivigisimanngilaa.

Ærø Efterskolemi 10. klassertut marluinnik oqaasilittortaannut aamma misilitsiffiusassanngilaq. Qallunaatoorneq, tuluttoorneq kisitsinerlu taakkununnga atuartitsissutaasassapput, atuartitsissutinilli allanik efterskoleqatitik assigalugit aamma toqqagassinneqartassallutik.

Efterskolertut atuartarnissaat pingaarpoq, aammali najugaqarfimminnik illoqatiminnillu nuannarinninnissaat pingaarluinnarpoq. Atlantikup Avannaaniillu aamma nunatsinniit efterskoleriat illoqatigiittalissasut, Lasse Bøgeskov oqarpoq.

- Efterskoleleqqammertut akuleriisillugit illoqatigiisinneqakkajupput, Kalaallit Nunaanneersulli Maj Blazejewiczip innersuussutaa malillugu allatut inissitsitertassasut aalajangerpugut, taanna oqarpoq nangillunilu:

-  Tassa illoqatigiittalissapput.

Maj Blazejewiczimi Danmarkimi efterskolertuunerup nunatsinneersunut nuannernerulersinnissaanik Galtrup Efterskolemi ukiut qulit matuma siornali suliniuteqaleqataasunut ilaavoq. Assi © : Galtrup Efterskole

Tamanna Danmarkimut efterskoleriat nunatsinneersut toqqissisimanerulersarnerannik, ingerlalluarnerulersarnerannik angerlarsertortaqarpiassaarnerannik kinguneqartoq, Maj Blazejewiczip Galtrup Efterskolemi sulitilluni maluginiarpaa.

- Toqqissimanartumik aallartinnissaannut namminiussuseqarnissaannullu periarfissiineruvoq. Efterskolemimi allartikkaanni nutaarpassuit, soorlu Danmarkimiinnermi angerlarsimaffimmiit ungaseqaluni nalunaaquttallu nikingasut, ilikkarniagassaapput, taanna oqarpoq.

Nunatsinniimmi efterskoleriat ernumassuteqarnatik ajornaatsumillu Danmarkimiinnissaannut efterskolet ikiuussinnaasut, taanna isumaqarpoq.

Qinnuteqartut arfineq-marluusut

Galtrup Efterskolep nunatsinniit efterskolerianut illoqatigiisitsisalernera misilitsiffiussaarneralu Morsimi efterskolertut nunatsinneersut amerlinerannik kinguneqarpoq.

Ærø Efterskolemut atuariat nunatsinneersortaqarnerusalernissaat aamma neriuutigigitsik, Lasse Bøgeskov oqarpoq.

- Ukiuni atuarfiusuni kingullerni marlunni efterskolertut pingasunik sisamanilluunniit kalaalersartaqartarput. Ukiullu atuarfiusussami tullermi aallartikkusullutik qinnuteqartut maannamut arfineq-marluupput. Tassa efterskoleriarfigissallugu siornatigorninngarnit nuannerunartinneqarnerulersimarpasippoq, taanna oqarpoq.

Naallu suliffigiligassani suliffitoqqaminit mikinerugaluartoq, Galtrup Efterskolemi misilittakkatik Ærø Efterskolemi atorneqarsinnaalluartut, Maj Blazejewiczip oqaatigaa.

- Kalaallit Nunaanneersut immikkut misigisaqartinnissaat iliuuseqarfigissallugu pingaartuusoraara, tassami Danmarkimi klasseqariaatsimut nalinginnaasumut ilanngutitiinnarsinnaanngilagut.