Efterskolip ajornartorsiutaasoq aaqqiissuteqarfigigaa – kalaallimik unitsitsiinnartoqanngitsoq
Kalaallit Danmarkimi efterskolertut 17 procentii atuarnertik naammassinngitsorluunnit unitsitsiinnartartut Galtrup Efterskolemi tamanna allaaneruvoq.
Kalaallit Galtrup Efterskolemi atuartut
- Kalaallit Nunaanni 10. Klassemi misitsinnermi angusisimasut
- kalaallinik allanik atuartunik najugaqateqarneq, kalaallit klassianni atuarneq, kalaallimik ilinniartitsisoqarneq/isumalluuteqarneq
- danskisut sapaatip-akunneranut akunnerit aqqanillit atuartinneqarneq. Taakkunannga akunnerit sisamat danskisut ilitsoqqussarinagu oqaaseqarnermik atuartitsinerupput. Tamatuma saniatigut matematikkimi tuluttullu atuartitsisoqartarpoq.
- Ukioq atuarfiusoq kalaallinut atuartunut misilitsiffiunngilaq, ukiorli atuarfiusoq atuartitsissutini pingasuni suliaqarnermik naammassineqartarpoq.
- Kalaallit atuartut atuartitsissutinik nammineq qinigaqartarput, eqimattakkaartarput, kalaallillu klassiata avataani danskit atuartut akornanni sammisassaqartitsisoqartarpoq.
Tusarfik: Galtrup Efterskole
Morsip qeqertaani, Linfjordenimi efterskolemi atuartut 130-upput, kalaallillu tassunga atuariartortartut ukiuni kingullerni amerliartorput.
Ukioq manna atuarnermi nunatsinnit atuariartortut 50-iupput – taakkunanngalu maannamut suli unitsitsiinnartoqanngilaq.
Atuarfiullu kalaallit allat arfineq-pingasut danskit efterskolinit allanit aggustimiilli unitsitsiinnartut aamma atuartuutigilersimavai.
Efterskolip forstanderiata, Jens Hvidip oqarnera naapertorlugu kalaallit klassinut ataatsimoortinnerat kalaallimillu ilinniartitsisoqartinnerat aamma ineeraqatigiikkuutaartinnera kalaallisullu oqaloqatigiilluarsinnaanerat iluatsitsilluarnermik nassataqarpoq.
AAMMA ATUARUK Kalaallit efterskolertut 17 procentii unitsitsiinnartartut
Atuartut nutaanik ilikkagaqarnissaannut toqqissisimanarnerulernissaa siunertaavoq.
- Kalaallisut oqalussinnaaneq atugarissaarnissaasa ilaannut pingaaruteqarluinnarsinnaavoq. Kalaallimik ineqateqaraanni nalinginnaasumik oqaloqatigiittoqarsinnaavoq, unammillernartunullu danskit meqqat akornanni nalaanneqarsinnaasunut sakkussaqarnerusarlutik, Jens Hvid oqarpoq.
Atuartitsineq misilitsinnissamut uippakajaarfiunngitsoq
Galtrup Efterskolemi atualernissamut nunatsinni meeqqat atuarfiani misilitsinnermi angusisimanissaq piumasaqaataavoq.
Taamaammat atuartitsineq misilitsinnertaqanngilaq – taamaammallu sakkortuallaarani – taamaakkaluartorli danskisut, tuluttut matematikkimilu kalaallisut atuartitsineq ukkatarineqarpoq.
Danskit efterskoliini unitsitsiinnartartut
Kalaallit ukiuni atuarfiusuni atuartut:
2016/17: 17 procent
2017/18: 15,4 procent
2018/19: 17,2 procent
Ukiuni atuarfiusuni danskit atuartut:
2016/17: 11,2 procent
2017/18: 11,3 procent
2018/19: 10,7 procent
Tigusiffiit: Danmarkimi Efterskoleforeningen, Peqatigiiffik Kalaallit Meerartaat
Tamatuma saniatigut assigiinngitsunik naleqquttunik assersuutigalugu danskit NemID-anik atuinermik, qimuttuitsunut bussinut pilersaarutinik allanillu kalaallit atuartut Danmarkimi ilinniarnerminni sulinerminniluunniit atorsinnaasaannik ilinniartitsisoqartarpoq.
Kalaallilli atuartut danskit atuartut atuartitsissutini qinikkani atuartitsinerullu avataani sammisassaqartitsinerni ilagisarpaat.
Forstanderi: Toqqissisimaneq danskisut ilinniarnissamut sapiissusinitsitsisarpoq
Najoqqutarineqartoq kalaallit qinnuteqartartut ukiuni qassiiusuni amerligaluttuinnarnerat – taakkulu akornanni unitsitsiinnartartut amerliartuinnarnerisa kingunerisaanik ukiut tallimat matuma siorna pilersinneqarpoq.
Oqaatsitigut ajornartorsiuteqarneq toqqissisimannginnerlu atuagarsornermi unammillernartut saniatigut unitsitsiinnartut pissutigisaraat maluginiarneqarpoq.
AAMMA ATUARUK Siulittaasup unitsitsiinnartut pissutaat tupaallaatigigai
- Unitsitsiinnartartut misissoqqissaaratsigit ataatsimoortarnermut atuarfiullu sakkortuallaarneranut tunngassuteqartoq paasivarput. Taamaalillutik kalaallit atuartut tunorliullutik nipaallutillu issiaannarput, Jens Hvid oqarpoq.
Taamaammat atuarfik kalaallit atuartut ataatsimoortinniarlugit immikkut suliniuteqarniarluni aalajangerpoq.
Tamannalu danskisut piginnaasaqarnerulerniarnissaanut periarfissanut ajornarnerulersitsinngilaq, Jens Hvid oqarpoq.
- Killormuuanilli. Qaqqap qaqinissaa annerulinngilaq. Isumaqarpunga kalaallisut sunniivigineqatigiinneq danskinut atuartunut akuunissamut sapiissuseqartitsisoq.
Peqatigiiffik Kalaallit Meerartaannit nalunaarusiap tarnikkut ajornartorsiutit atugarissaannginnerlu kalaallit danskit efterskolini atuartut unitsitsiinnartartut, arfiniliugaangata ataatsip pissutigisarai takutippaa.
Nalunaarusiaq naapertorlugu kalaallit kalaaleqateqanngikkaangamik kalaalerluunnit ataasiinnaq ilagigaangamikku atuarfimmik unitsitsiinnarajunnerupput.
