URANI Eqqartuussissuserisut: Urani pillugu inatsisissatut siunnersuutit tunngaviusumik inatsimmut naapertuutinngillat
Isumarput malillugu namminerisamik inigisap mianernartuunera unioqqutinneqassaaq soorlu angerlarsimaffinnut uranimik misissuiartortoqarneratigut.
Radioaktivit pillugit Kalaallit Nunaanni uranimut tunngasunik siunissami misissuisoqassappat tunngaviusumik inatsisit unioqqutinneqassapput, Danmarkimi eqqartuussissuserisut kattuffianni allattaaneq Torben Jensen oqarpoq.
- Takorlooraanni aatsitassamik uranimik piiaavimmik pilersitsisoqartoq sulisullu inissaqartillugit. Taava inatsisissatut siunnersuut naapertorlugu sulisut inaannut pisortat misissuiartorsinnaalissapput. Isumaqarpugulli tamanna ingasappallaartoq, eqqarsaatigeqqinneqartariaqarlunilu.
Aamma atuaruk Urani pillugu inatsisissatut siunnersuutit taperserneqarput
Tunngaviusumimmi inatsisit malillugit namminerisamik angerlarsimaffiit mianerineqartussaapput, pisortallu isersinnaassagunik eqqartuussisumit akuersissummik tunineqaqqaartussaapput.
Aatsitassallu radioaktivit pillugit misissuinissamut inatsisissatut siunnersuutigineqartumi allassimavoq, namminerisamik angerlarsimaffinnut isernissamut pisortat immikkut ittumik akuersissummik peqassasut.
Misissuinissarlu peqqutissaqanngikkaluartoq tamanna pisinnaasoq, eqqartuussissuserisut siunnersoqatigiivisa maluginiarpaat.
- Misissuinissamut malittarisassanik taama ittunik sanagaanni taava naatsorsorneqaqqaartariaqarpoq, inuit namminerisamik angerlarsimaffiinut isinngikkaluarluni pisortatut qanoq allatut paasissutissanik pissarsisoqarsinnaanersoq.
Aamma atuaruk URANI Kirkegaard: Siumup politikkiat ersarippoq
Aamma atuaruk URANI Aleqa Hammond: Inatsisigut illersuereerput
Aamma atuaruk URANI IA: Partii Siumut isummertariaqarpoq
Pisortallu inuussutissarsiortut pigisaanni angerlarsimaffinnut taamaallaat misissuiartornissaminnut periarfissaqarnissaat namminerisamillu angerlarsimaffinnut isernissamut eqqartuussisumik akuersissummik peqaqqaartarnissaat eqqartuussissuserisut siunnersuisoqatigiivisa unnersuutigaat.
Uranimillu piiasut suliffeqarfiini misissuisarnissami inatsisissani atuutilertussani angerlarsimaffinnut alakkarteriniarnermi kalerreeqqaartarnissaq pingaarnertut malittarineqassasoq ilanngullugu oqaatigaat.
Danmarkimimi suliffeqarfinni misissuisarnermi oqaqqaarnani takkuttarneq suliffeqarfinnut akisoorujussuanngorsinnaasartoq ilisimaneqarluarpoq, amerlanertigullu oqaatigeriikkamik misissuineq oqaatigeqqaarnagu misissuinermiit ajornarnerujussuusartoq.
