Assi: KNR

URANI IA: Partii Siumut isummertariaqarpoq

Inuit peqqissusaat akigalugu uranimik piiaaniartut pissaaneq atornerlulerpaat. Inuit Ataqatigiit Siumut pissaanermik atornerluinerarlugu tusagassiuutinut nalunaarut taama qulequtserpaat.

Siumumi siornatigut siulittaasuusimasup, Folketingimullu maanna ilaasortap Aleqa Hammondip, inuit nunatsinni peqqissusaat innarlitsaaliornagu uranisiiornikkut aningaasarsiupallannissaq kissaatigigaa, Inuit Ataqatigiit politikkikkut oqaaseqartartuata Aqqaluaq B. Egedep tusagassiuutinut nalunaarummi uissuummissutigaa.

- Massakkut paasinarsivoq Siumut siuttoralugu naalakkersuisooqatigiit sooq taama tuaviuussitigalutik inuiaqatigiillu akuutinnaveersaarlugit uranimik piianissaq tuaviinnaq akueriniarsarigaat, Aqqaluaq B. Egede ilaatigut allappoq.

Naalakkersuisut siulittaasuata akisussaaffimmik tigusinissaa, Inuit Ataqatigiit politikkikkut oqaaseqartartuata taamaammat kaammattuutigaa:

- Akuersaaginnarneqarsinnaanngilaq inuiaqatigiit qinigaasa inuit peqqissusaat pingaarnerutinnagu sulinertik ileqquliutissappassuk, Aqqaluaq B. Egede taama allappoq, Aleqa Hammondillu naalagaaffeqatitsinnut pisortatigoortumik oqaaserisai Parti Siumut isumaqatiginerai, Naalakkersuisullu siulittaasuata Kim Kielsenip aamma isumaqatiginerai apeqqutigalugu.

Inatsisiliornerit aalajangersaanerillu kiisalu nunat allat peqatigalugit isumaqatigiissusiornerit naalakkersuinikkut aallartereersut Aqqaluaq B. Egedep tikkuartorpaa, suliallu Naalakkarsuisuniit inaarsarneqaleruttortut eqqaasitsissutigalugu, naak Siumut oqartuartaraluartoq "aatsaat inuit peqqissusaannut avatangiisunullu piumasaqaatit qulakkeeqqaarlugit uranimik piiaanissaq akuerineqassasoq", oqarpoq:

- Tamanna salluneruvoq, pisuusaarneruvoq, inuiaqatigiillu akerliulernerannut nipangersaataannaavoq timitalerneqanngitsoq, aamma timitaleruminaallereersoq. Partii Siumut isummertariaqarmat, akisariaqarmat, naalakkersuinikkullu assortuussutaaqisunut aamma inatsisartunut ilaasortaatitai naalakkersuisuutitarisaallu akisariaqarmata, aamma akuusariaqarmata, Inuit Ataqatigiit politikkikkut oqaaseqartartuat ilaatigut taama allaaserisaqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat