Aavarfinngorpoq: Kommuni aavarianut GPS-inik akeqanngitsumik atukkiussisut

- Ilaquttat taama ernumajatigisut ilaqutaralugit pingaaruteqarpoq attaveqallattaarnissaq imaluunniit nalunaallattaarnissaq, sunngiffimmini piniartartoq Gustav Olsen Brandt taama oqarpoq.

Allattoq Christine Hyldal, Gaaba Olsen

aggustip 03-at 2023 13:58

Nutserisoq Sussi Jensen

Marlunngormat tuttut piniarneqarsinnaalernerat aallartippoq.

Ullumimiit qaammatinilu tulliuttuni aavariat silarsuup sinneranut attaveqaratik qoorortuulisarlutik pinngortitami angalaartussaapput.

Taamaammat Kommuneqarfik Sermersuup Nuummi inuit - assersuutigalugu piniartut - GPS-iaqqamik pinngortitamut nassarsinnaasaannik atukkiussinissamik neqerooruteqarput. Taanna kaasarfimmiitinneqarsinnaavoq aamma ilaquttat angerlarsimasut attaviginissaannut atorneqarsinnaallunilu ajornartorsiornermi kalerriutitut atorneqarsinnaavoq.

Gustav Olsen Brandt aavariartussaavoq.

- Ukioq manna ungasilaartumut aavarnissara misilikkusuppara, taanna oqarpoq.

Aamma atuarukPolitiit aavarneq pillugu: Pujoq alaatsinaaguk uternissallu kalerriutigiuk

Taassuma ajornartorsiut ilisimaneqarluartoq atugaraa, tassa qanigisaasa ajunnginnersoq paaserusuttarpaat.

- Ilaquttat taama ernumajatigisut ilaqutaralugit pingaaruteqarpoq attaveqallattaarnissaq imaluunniit nalunaallattaarnissaq, Gustav Olsen Brandt oqarpoq.

- Pinngortitamiilluni susoqarsinnaanera nalunartarami.

Ajunaalernermi kalerrisaarut ilaquttanullu nalunaarut

Kommuneqarfik Sermersuumi sammisassaqartitsinermik immikkoortortaqarfimmut GPS-imik taamaammat aallersimavoq. Ima atorneqarsinnaavoq soorlu, Gustav Olsen Brandtip nammineerluni nunap assingi aaqqissorsinnaavai. Ilaquttaminut apuulluarsimanini ajunnginninilu pillugit aamma allassinnaavoq. Imaluunniit ajoqusersimaguni tammaruniluunniit kalerrisaarisinnaavoq.

Sequssuna Fleischer Schmidt sammisassaqartitsinermik immikkoortortaqarfimmi siunnersortiuvoq. Taassuma oqarnera naapertorlugu kommunip GPS-it pigereersimavai - taamaammat iluaqutaasussatut agguaakkusussimavaat:

- Eqqarsaatiginikuugatsigu pigereeriatsigit inunnut atukkiukkusullutigit, isumannaallisaaneq taavalu isumannaannerusumik immaa aavassagunik pisuttuassagunilluunniit atorsinnaaniassammassuk, taanna oqarpoq.

Tuttut umimmaallu piniarneqarsinnaalernerat

Aavarfiup nalaani inuit tammaaneqartarnerat politiillu SAR-imik (Search and Rescue, aaqq.). ujaasisaleriaqartarnerat nalinginnaavoq.

2019-imi, 2020-mi 2021-milu aggustimi katillugit 25-riaq ujaasisoqarpoq.

Ukiuni pingasuni taakkunani aamma septembarimi katillugit 24-eriaq ujaasisoqarpoq.

Aamma atuarukAugustimi ilinniagassat alarlugit aallaat tigusassanngortoq: Qeqqata Kommuniani aavarfiunerani atuanngiffeqartalertut

SAR-imik ujaasinerit sisamararterutingajaat qaammatini taakkunani marlunni aavarfiusuni pisarput.

Piniariarnissamut siunnersuutitsialaat tallimat

Aallartinnak silasioqqaarit
Ilaquttatit ikinngutitillu aallalernerit pillugu kalerrikkit, qaqugulu uternissat ilimaginerit aamma oqaluttuutikkit.
Umiatsiat orsussamaaserluaruk, aammalu attaveqaatit pitsaasut nassakkit, mobil telefoni kisiat isumalluutiginagu, taannami attaveerussinnaasarpoq, VHF-radio, satellittelefoni, Inreachiluunniit nassaruk.
Annanniut atallaarsuilluunniit puttasartut nassakkit. Annanniummik qummoroortartumik ikumatittakkamilluunniit nassataqarit. Ajutuussagaluaruillu Aasiaat Radioanut kanal 16-mut attaveqapallagit.
Aallaat imaqanngikkaluarpalluunniit imaqartutut paasisaruk, inuillu tungaannut ummiusseqinak, aatsaallu uumasumik pisaqartussannguleruit igeriarit. Atorunnaarniarukkulu imaapallaguk soorlu, umiatsiamut, tupermut illuaqqamulluunniit apuunninni.

Qaammatinilumi taakkunani inuit arlaqartarput pinialunnianngikkaluarlutik umiatsiamik angalaannartut nunalluunniit timaani pisukkusuinnartut. Ujaasinerillu kisitsisaanni pinialunniartut piniarianngitsullu ujarneqarneqartut politiit immikkoortinneq ajorpaat.

Inuussutissarsiutigalugu piniartut aggustip aallaqqaataaniit oktobarip 15-iata tungaanut imaluunniit, nunatsinni sumi najugaqarnerat apeqqutaalluni, decembarip 31-iata tungaanut tuttunniarsinnaatitaapput.

Sunngiffimmi piniartut aggustip aallaqqaataaniit septembarip 30-iata imaluunniit oktobarip 31-iata tungaanut tuttunniarsinnaatitaapput - aamma nunatsinni sumi najugaqarnerat apeqqutaalluni.

Nunatta avannarpasissuanili aavarfik decembarip 31-ianni killeqarpoq.

Nuummi Imaneq 23-mut sammisassaqartitsinermik immikkoortortaqarfimmut GPS-imik aallersinnaavutit. Akeqanngilaq.

Nutaarsiassami kukkunermik nassaarsimaguit uunga allaffigineqarsinnaavugut.