Augustimi ilinniagassat alarlugit aallaat tigusassanngortoq: Qeqqata Kommuniani aavarfiunerani atuanngiffeqartalertut

Qeqqata Kommuniani meeqqat atuarfianni atuartut aasaru atuanngiffeqareerunik nalinginnaasumit kingusinnerusukkut atualeqqissapput.

Aggusti naalerpat aatsaat taqualiornerit makiaarnerillu pissapput. Aavarneq aggustip aallaqqaataani aallartippat meeqqat angajoqqaatit peqatigalugit eqqissillutik pilisinnaanngorput.

Nive Heilmann Efraimsenip tamanna nuannaarutigaa. Taanna Qeqqata Kommuniani kommunalbestyrelsimi Inuit Ataqatigiit sinnerlugit ilaasortaavoq aasaaneranilu atuanngiffeqarnerup kultooritsinnut nalimmassarnissaa sorsuutiginikuullugu.

- Soorunami nuannaarpunga, aamma atorluarnissaanut qilanaarpunga, Nivi Heilmann Efraimsen oqarpoq.

Eqalunniarnerit, kapisilinniarnerit, aavarnerit, umimmanniarnerit allallu aasaanerani pisarput. Takkulu pineranni meeqqat atuanngiffeqartariaqarmata kommunalbestyrelsimi ilaasortap anguniarsimavaa. Tamannalu maanna iluatsimmat atuartut nunatsinni inooriaasitsinnik aallussinerulissasut Nivi Heilmann Efraimsenni oqarpoq.

AAMMA ATUARUK Nivi Heilmann Efraimsen: Atuanngiffeqartarnerit kulturitsinnut tulluarsarnerunissaat piffissanngorpoq

- Periarfissaqarnerulissaagut pilersornerusinnaanissatsinnut eqqissilluta tuaviupilugata inooriaaserput atorlugu, taanna oqarpoq.

Tamannalu Minngortuunnguup atuarfiani Sisimiuniittumi pisortap isumaqatigaa.

- Upernaakkut atuartut atuarunnaariartuleraangamik suli nuna masattoq, ilaatigut aputeqartoq sermeqartoq atuarfimminngaanniit nunami pinngortitami atuilluarnerunissaat tassani angusinnaavarput, Uvdloriaq Kleist oqarpoq.

Pilersaarusiornissaa tullinnguuttoq

Atuartut atuanngiffeqartarnerisa ullui ukiorpassuarni allanngortinneqarnikuunngimmata pilersaarusiornikkut kalluaassasoq atuarfiup pisortaata oqaatigaa.

- Suu, taanna pissanganarpoq. Assigiinngitsunik kalluaasussaavoq. Ilaatigut ilinniartitsisut sulinissaminnut isumaqatigiissutaanni qaqugukkut suliartortittalissavagut, qaqugukkut feriaat aallartittassavarput. Tassunga kalluaasussaavoq, Uvdloriaq Kleist oqarpoq, nangipporlu:

- 10.klassit isaasalerlugu nalinginnaasumik atuarnerat ullut qulit missaanik annikillisussaavoq. Kisianni taamaammat pilersaarusiornermi taakkua eqqarsaatigilluarneqassapput. Suut immikkut sammisaqarnerit, suliffimmi misiliinerit allallu nalinginnaasumik atuarfiunngitsut qanoq aaqqissuutissanerigut. Sinnerinut ajornavianngilaq.

AAMMA ATUARUK Qeqqata Kommunia: Meeqqat atuarfianni atuanngiffeqartarneq pillugu siunnersuut alloriarfiuvoq

Allanngortitsineq aatsaat atuutilissammat sungiunneqarumaartoq atuarfimmi pisortaq oqarpoq.

- Sungiutikutsuussavarput, aamma eqqarsaatip uuma pinngornerani atuartut ukiakkut aasarisseruttortoq aatsaat atuariartortitaasaramik. Ilaatigut ilaquttatit ilagalugit asiarlutillu pinissaraluat pinngitsoortillugu, Uvdloriaq Kleist oqarpoq.

Maniitsumi eqqaanilu meeqqat aggustip 29-ani atuariartoqqissasut, Sisimiuni eqqaanilu meeqqat aggustip 24-ani atuariartoqqissapput.