Politiit aavarneq pillugu: Pujoq alaatsinaaguk uternissallu kalerriutigiuk
Inuit ilaannut ullumikkut ulloq soorlumi juulliinnakasillartoq.
Aallaat ammuppaat, savitik piareersarpaat, sinngup puutik poortorpaat nammattakkatillu umiatsiamut ikeriarlugit asu timaanut aallaannaqaat, ullumimiimmi aavarfik aallartippoq.
Aggustip septembarillu qaammataanni pinngortitarsuarmi aavarianik misilittagakitsunik tammartajaartunik ajoqusertunillu ulikkaarsorigukku, ila kukkuallaarsimanavianngilatit.
Kalaallit Nunaannimi politiit naapertorlugit, aggustimi septembarimilu aavarianik ujaasinerit ukiup sinnerani ujaasisarnernut sanilliullugit kisitsisitigut aalaakkaapput.
- Kisitsisit nikerartorsuunngillat aalaakkaasutut taaneqarsinnaapput, politeeqarfimmi pigaartunut pisortaq Nûno Larsen oqarpoq.
2019-mi, 2020-mi aammalu 2021-mi aggustip qaammataani ujaasinerit katillugit 25-iupput, ukiunilu taakkunani septembarimi ujaasinerit 24-iullutik.
Paasissutissat
SAR naalisagaavoq Search and Rescue-mit. Imaani nunamilu inunnik angalasunik ujaasinermik isumaqartoq.
2019-mi 78-t SAR aqqutigalugu ujaarineqarput, taakkunannga 26,9 procenti aggustimi septembarimilu ujaasinerupput
2020-mi SAR aqqutigalugu ujaarineqartut 46-upput, taakkunannga 26 procentii aggustimi septembarimilu ujaasinerupput.
2021-mi SAR aqqutigalugu ujaarineqartut 59-upput, taakkunannga 27,1 procentii aggustimi septembarimilu ujaasinerupput.
Tusarfik: Kalaallit Nunaanni politiit 2021-miillu politiit naatsorsueqqissaarineraniit.
Pujoq inuilaarsuarmilu kisimiinneq
Ukioq tamaat isigissagaanni qaammatini marlunni aavarfiup nalaani ujaasinerit sisamararterutaa sinnerlugu annertussuseqartarpoq.
Qaammatinilumi taakkunani arlaqartarput pinialunnianngikkaluarlutik umiatsiamik angalaannartut nunalluunniit timaani pisukkusuinnartut.
Isumannaatsumillu angalanissaq pillugu tallimanik eqqaamasassanik siunnersuutissaqarpoq.
- Aallartinnak silasioqqaarit
- Ilaquttatit ikinngutitillu aallalernerit pillugu kalerrikkit, qaqugulu uternissat ilimaginerit aamma oqaluttuutikkit.
- Umiatsiat orsussamaaserluaruk, aammalu attaveqaatit pitsaasut nassakkit, mobil telefoni kisiat isumalluutiginagu, taannami attaveerussinnaasarpoq, VHF-radio, satellittelefoni, Inreachiluunniit nassaruk.
- Annanniut attallaarsuilluunniit puttasartut nassakkit. Annanniummik qummoroortartumik ikumatittakkamilluunniit nassataqarit.
- Ajutuussagaluaruillu Aasiaat Radioanut kanal 16-mut attaveqapallagit.
Aallaat imaqanngikkaluarpalluunniit imaqartutut paasisaruk, inuillu tungaannut ummiusseqinak, aatsaallu uumasumik pisaqartussannguleruit igeriarit. Atorunnaarniariarukkulu imaapallaguk soorlu, umiatsiamut, tupermut illuaqqamulluunniit apuunninni.
Tuttussinnaanermut akuersissummik pappiaraateqarani tuttumik umimmammilluunniit pisaqaraanni paasisaagaannilu taava susoqassava?
- Tamanna akiliisitaanermik pisamillu arsaarinninnermik kinguneqarsinnaavoq, piniarnermullu allagartaajarneqartalersinnaavutit imaluunniit aallaasinnik umiatsiannilluunniit tamanna arsaarinnissutaasinnaavoq, Nûno Larsen oqarpoq.
- Taamaattoqakulasarpa?
- Qujanartumik naamik, inuimmi inatsisinik unioqqutitsinissartik ornigineq ajorpaat, politiit pigaartuisa ittuat oqarpoq.