Aatsitassat qaqutigoortut soqutigineqaleriartorput
Danmarkimi suliffissuaqarnermik soqutigisallit nunarsuarmioqatigiit niueqatigiinnerat pillugu 2011-mi nalunaarusiaanni aqagu saqqummersinneqartussami soqutiginninneq atuarneqarsinnaavoq.
Mingutsitsinani nukissiornermi teknologilu nutaaq atorlugu nioqqutissiat tamarmik annerusumik minnerusumilluunniit nunap akuinik qaqutigoortunik aatsitassanilluunniit akoqarput. Akugisassallu tamakkua pissarsiariuminaatsillugit Danmarkimi tunisassiortut nalinginnaasumik siuarsimanersaasaraluarlutik unammillersinnaanerat annikillisarpoq, Dansk Industrimi tuniniaanermut politikkikkut pisortaq, Peter Thagesen oqarpoq.
Kinami nuna qaqutigoortunik akoqarluarmat tunisassiorneq Kinamiunit aqunneqarpoq, taamaammat Nunatta kujataani pisuussutit soqutigineqarluarput.
Kinamiut tamakkunannga tunisassiortutuaagamik nunap akuinik qaqutigoortunik annissisinnaaneq killilersorlugu, nunat allat tunisassiorfiisa Kinami suliffeqarfiliornissaat pinngitsaaliissutigigaat oqaatigineqarsinnaavoq, akillu qaffatsillugit.
Taamaalillutik nunap akui Japanimiut tunisassiornerminnut atugassatik pissarsiarisinnaaniarlugit tunisassiornertik Kinamut nuuttariaqartarpaat. Araberit uuliaatimik akianik aqutsisinnaanerattuut Kinamiut nunap akuisa qaqutigoortut akiat qanorlu annertutigisumik tunisassiarinerat piumasaminnik aqussinnaavaat.
Pissutsit taamaannerat Bruxellesimiit nakkutigeqqissaarneqarpoq.
Nunap akui qaqutigoortut ullumikkut 120.000 tonsit tunisassiarineqartarput, tunisassiarineqartullu ukiumut 10 procentimik annertusiartornissaat ilimagineqarluni.
Nunatta Kujataani Kuannersuarni ukiut 25-it ingerlanerannni nunap akui qaqutigoortut 43.000 tonsit tunisassiarineqarsinnaanissaat ilimagineqarpoq.
- Taamaammat akussat qaqutigoortut tunisassiarineqarneranni Nunatsinni innuttaasut kissaatigisaat eqqorlugit tunisassiarineqarsinnaasut annertuumik sunniuteqalersinnaapput, nunaniillu allaniit Nunatsinni suliffeqarfinnik pilersitsisoqarsinnaanera kajumigineqarnerulissalluni, Peter Thagesen oqarpoq.
