Aviisi: Aatsitassarsiutileqatigiiffik aningaasanik Ittoqqortoormiini kulturilerinermut tunissuteqarpoq
Canadamiut aatsitassarsiutileqatigiiffiat, Greenland Resources, aningaasanik Ittoqqortoormiini kulturilerinermut tunissuteqarpoq.
Sermitsiaq.AG. taama allappoq.
Aatsitassarsiutileqatigiiffik Kommuneqarfik Sermersuumut ukiuni marlunni isumaqatigiissuteqarpoq, Ittoqqortoormiit katersugaasivianut aammalu 2025-mi Ittoqqortoormiit ukiuni 100-nngortorsiornissaannut atatillugu nalliuttorsiutissanik aningaasanik tapeeqataaniarluni.
Aatsitassarsiutileqatigiiffik aammalu Kommuneqarfik Sermersooq, Sermitsiaq.AG-mut taama oqaluttuarput.
Greenland Resources Ittoqqortoormiiniit 140 kilometerit missaanni ungasissusilimmiittumi Malmbjergemi piffissami matumani aatsitassarsiorfimmik ammaanissamut periarfissarsiuleruttorput, tamaanimi aatsitassaq mylobdæn piiarnialersaarpaat aatsitassarlu taanna saviminiliassaavoq.
Taakku aatsitassamik piiaanissaannut atatillugu VVM-ip aammalu VBM-ip nalunaarusiaat Namminersorlutik Oqartussaniit siorna ukiakkut akuerineqarpoq.
Greenland Resourcesip siulersuisuisa siulittaasuat Ruben Shiffman siusinnerusukkut KNR-mut aamma oqarpoq aatsitassarsiorfiliassap ungasinngisaaniittumi Mestersvigimiit 30 kilometerinik ungasissulimmiittumi mittarfimmik anginerusumik sananissamut aningaasaliissuteqarnissartik aamma piareersimaffigalugu.
Mittarfillu taanna aatsitassarsiorfimmi sulisussanut aammalu Ittoqqortoormiini najugalinnut iluaqutaassaqisoq, Ruben Shiffmannip erseqqissaatigaa.
Issittumi sakkutooqarfik KNR-mut oqarpoq, aatsitassarsiornissamut suliniut taanna namminneq itigartikkitsik.