Aatsitassarsiornemit isertitat pillugit qallunaat politikerii isumaqatiginninniarnissamut ammasut

Aatsitassanit pisuussutinillu uumaatsunit allanit isertitat ullumikkumut periarfissaasunut naleqqiullugu siunissami nunatta aningaasarsiorfigilluarsinnaavai.

Taama Inatsisartuni partiit tamakkerlutik KNR-ip sapaatip-akunnera kingulleq oqallitsitsinerani oqarput.

Tassani Namminersorneq pillugu inatsimmut Demokraatit siulittaasuata Jens-Frederik Nielsenip ilaatigut unnersuussussivoq.

Aatsitassarsiornermiit isertitaasut ukiumut 75 millionit koruunnit sinnerpatikkit Naalagaaffimmiit tapiissutinit ilanngaatigineqartassasut § 8-mi allaqqavoq.

- Eqqaamassavarput, ullumikkut namminersornermut inatsit piutillugu aatsitassarsiorfiliorsinnaanngilagut tamakkiisumillu aningaasarsiorfigalugu. Taamaammat taanna siullertut allanngortinneqartariaqarpoq, Jens-Frederik Nielsen oqarpoq.

Tamanna Siumup, IA-p, Atassutip aamma Naleqqap oqallinnermi taperserpaat.

Christiansborgimit taperserneqartoq

Christiansborgimi partiinit tamanna aamma taperserneqarpoq.

Aaqqissuussineq allanngortittariaqartoq eqqarsaatigisimagini, Det Konservative Folkepartiimi Issittoq pillugu oqaaseqartartoq Rasmus Jarlov KNR-imut oqarpoq.

- Aatsitassammi piiarneqalissappata Kalaallit Nunaatalu iluanaarutit tamakkiisumik pisinnaanngippagit pilerisaarinermut aaqqissugaaneq ajorsimavoq. Immaqa Kalaallit Nunaanni aatsitassat taama annertutigisut piiarneqarnissaannut pilerisaarineq malunnaateqarnerusuuppat aallartisarnerusoqassagaluarpoq.

Ivittuuni orsugiassiorfiusimasup DR-ip piviusulersaarusiaa "Grønlands hvide guld" takutinneqarnerata kingorna Kalaallit Nunaanni aatsitassanit aningaasarsiuteqarnerunissamik pisariaqartitsinermik Inatsisartuni partiit siulittaasuinit nalilerneqarpoq.

Det Konservative Folkepartiinit Kalaallit Nunaata aningaasaqarnikkut siuariartornissaa kissaatigaat taamaaliornissaamullu ikiuukkusupput.

Kalaallit Nunaanni aatsitassarsiornermit isertitanit ilaanik Danmark qanoq ilinikkut pisarnissaanik killeqaqqissaartariaqanngitsoq, Rasmus Jarlov isumaqarpoq.

- Piviusorsiorpallaarunanngikkaluartoq taamaattoqariasaassappalli, ilumut aatsitassaqarfimmik isertitsissutaangaatsiartussamik pingasunik kisitsisilatilinnik aningaasanik milliardikkuutaanik isertitsissutaangaatsiartussamik aatsitassaqarfimmik nassaartoqassagaluarpat, isumaqarpunga eqqumiissasoq uagutsinnut qallunaanut isertitaasinnaajumaartut ilaanit tunineqassanngikkutta taanna oqarpoq.

Kalaallit Nunaata Namminersorneq pillugu inatsimmi aatsitassarsiornermut susassaqarfik Juunip 21-ani 2009-mi akisussaaffigilerpaa.

Sooruna ullutsinni Kalaallit Nunaanni aatsitassat namminneq oqartussaaffigigaallu, taakkunannga Danmark isertitsissutaasut ilaannik tunineqartariaqartut isumaqarpit?

- Ilimananngilluinnartumilli pisoqassagaluarpat tassa aatsitassaqarfeqalernerani Kalaallit tamarmik aningaasaatilissuanngussagaluarpata, tamakkumi  tamaasa tunniukkutsigit uagut qallunaat tungaanniit ussiataarneqartutut misigisimalaarsinnaassasugut, Rasmus Jarlov oqarpoq.

Minitseriuneq: Inatsit allanngortinneqarsinnaavoq

Namminersorneq pillugu inatsimmi allaqqareersunit Kalaallit Nunaat qanoq  suliassaqarfinnik suli tigusiartuaarsinnaatiginersoq pillugu, folketingimut ilaasortap Aaja Chemnitz (IA) marlunngormat Folketingimi apeqqarissaartoqarnerani apeqqutigaa.

Tassani Namminersorneq pillugu inatsip imarisaanik isumaqatiginninniartoqaqqissinnaasoq ministeriunerup Mette Frederiksenip (S) oqariartuutigaa.

- Arlalitsitsigut inatsit nalunngereerparput. Kisianni soorunami siunissami nutaanik kissaateqalertoqassappat, soqutigisaqalertoqassappat pisariaqartitsoqalissappallu inatsit aamma allanngortinneqarsinnaavoq, taanna oqarpq.

Aatsitassanilli piiaanermi isertitanut tunngatillugu qanorpiaq malittarisassaqassanersoq eqqortumik Mette Frederiksenip oqaatiginngilai.

Tamanna Inatsisartunut 11. Marsi qinersisoqareerpat naalakkersuisunngortut saaffiginnereerpata aalajangerneqarumaarpoq.

- Assersuutigalugu uani taaneqartut pillugit, qinersisoqareernerata kingorna suliassaqarfiit akisussaaffigileriartukkat akisussaaffiillu nutaat akisussaaffigilissallugit naalakkersuisunit kissaatigineqarpat, uagut naalakkersuisutut misissornissaannut ammaffigissavarput, Mette Frederiksen oqarpoq nangillunilu:

- Soorunami. Soorunami!

KNR SF-imut Radikale Venstremullu aamma saaffiginnipput, sulili uterfigineqanngilaq.