DR-ip Ivittuuni orsugiassiorfiusimasoq pillugu piviusulersaarusiaq nittartakkaminit peeraa

DR-ip piviusulersaarusiaq "Grønlands hvide guld" nittartakkaminit maanna peerpaa, aaqqissuisuunerlu Thomas Falbe soraarsillugu.

DR tusagassiorfinnut pingasunngornermi taama nalunaaruteqarpoq.

Ivittuuni orsugiammik piiaaneq pillugu piviusulersaarusiaq sapaatit akunneri marlungajaat pingaartumik Danmarkimi nutaarsiassaqartitsivinni oqallisigineqangaatsiareersorlu taamaaliortoqarpoq.

Piginneqatigiiffiit assigiinngitsut, Danmarkip naalagaaffia taakkununnga ilaalluni, 400 milliardit koruunit pallillugit nalinginut orsugiammik piiaanermi ukiut ingerlanerini kaaviiaartitaqarsimasut piviusulersaarusiami ilaatigut oqaatigineqarpoq.

Kisitsit saqqummiunneqartoq aningaasarsiornermik immikkut ilisimasallit arlallit, Danmarkimilu politikerit apeqquserpaat.

Piviusulersaarusiap aallakaatinneqarsinnaanissaa DR-ip arlaleriarluni akuersissutiginikuuaa. DR-illi nutaarsiassalerinermut pisortaata Sandy Frenchip oqarnera naapertorlugu paasissutissanik nutaanik pingasunngornermi pisimavoq, piviusulersaarusiallu nittartakkamit peerneqarnissaa DR-imit kingorna aalajangerneqarluni.

Kisitsisit Danmarkip orsugiammik piiaavimmit iluanaarutigisimasaanut titartagaliussamut tunngassuteqarunarput. Titartagaliussarli piviusulersaarusiamit ukioq manna januaarimi peerneqartoq, DR-ip nittartagaani atuarneqarsinnaavoq.

Naalakkersuisut siulittaasuat isornartorsiuisoq

Naalakkersuisut siulittaasuata Múte B. Egedep piviusulersaarusiap DR-ip nuttartagaanit peerneqarnera isornartorsiorpaa. Múte B. Egede ima oqarpoq:

"Orsugiak" DR-miit maanna peerneqarpoq - Qanoq aamma piviusumik saqqummiineq toqqorterniarneqassava. Piviusulersaarummimi saqqummiunneqartut tunngavippiaat toqqorterniarneqalerput.

Tassa Danmarkip nunarput qulaalluta aningaasarsiorfigingaatsiarsimagaa. Maqaasivara naligiinngitsumik naapertuilluanngitsumillu inuiattut pineqarsimanitta nassuerutigineqarnissaa.

Piviusormi oqaluttuarinagu aningaasartuutaannaasimanerarluta oqaluttuunneqartuarsimavugut.

Nunasiaatilittullu iliuuserisimasat pitsaanngitsut toqqortorniarneqarsinnaanngillat, piviusoq oqaluttuarinaveersaarlugu.

Piviusulersaarusiorsimasut aammaarlunga qutsavigeqqikkusuppakka, periarfissiimmata ammasumik piviusup saqqummiunneratigut oqallinnissamut, Múte B. Egede taama oqarpoq.

Sandy French, DR-ip nutaarsiassaqartitsivianut TVA-Livemut ima oqarpoq:

- Piviusulersaarusiap aallakaatinneqarsimannginnissaa kissaatigigaluaqaara, taamaaliorsinnaanngilangali, naalakkersuisut siulittaasuat oqarpoq.