Inatsisilerinermik professori suliap matoqqavissortuunissaa pillugu: Aatsaat pisariaqarluinnarpat

Qulimiguulik Narsamut pingasunngornermi ualikkut tikimmat angut tassunga seqqortaarpoq.

Inuit marluk seqqornernit eqqorneqarput, inuillu pingasut ajoquserlutik. Taakkuli tamarmik inuunerminnik navianartorsiunngitsut, Kalaallit Nunaanni Politiit pingasunngornermi paasissutissiipput.

Angut 20-nik ukiulik aallaarsersortoqarneranut atatillugu tigusarineqarpoq, kingornalu Qaqortumi Eqqartuussisoqarfik Kujallermi sisamanngornermi sassartinneqarluni.

Angut ulluni 28-ni tigummigallarneqassasoq eqqartuussisup aalajangerpaa.

Aallaasersortoqarneranut suna pissutaanersoq Kalaallit Nunaanni Politiit piffissami matumani paaissutissiissutigisinnaanngilaa, politiimmi matut matoqqavissortuunissaa eqqartuussivimmi piumasaraat.

- Suliami pissutsit pissutigalugu eqqartuussivimmi matut matoqqavissortuutinneqarnissat piumasaaraarput, taamaammat suliamut atatillugu qanoq paasissutissiisinnaanerput killeqarluinnarpoq, misissueqqissaarnermi pisortaq, Lars Bjerregaard tusagassiuutinut nalunaarummi oqarpoq.

Matut matoqqalluinnaraangata suliami matut matoqqasuutinneqassanersut pillugit isumaqatigiinniarnerit aamma matoqqasuutinneqatarput.

Tusagassiuutit taamaalillutik pasineqartup aqqanit, suliami suna pissutaasimanersoq pasilliutigineqartullu suunersut paasisinnaaneq ajorpaat.

Politiit matunik matoqqalluinnartitsinissamik kissaateqaraangata tamanna politiit unnerluussisussaatitaasullu suliami susoqarneranik tamanik ilisimanninnginnerannik kissaateqarajuttarpoq. Syddansk Universitetimi inatsisilerinermik professori, Sten Schaumburg-Müller nassuiaavoq.

Inuiaqatigiinnut akunnakusoorsinnaasoq

Eqqartuussivimmi suliat pillugit tamat ilisimannissinnaanissamut periarfissaqarnissaat pillugu inatsit tunngaviusumik ilusilersugaavoq.

- Kisianni kalaallit eqqartuussisarnermi inatsisaanni pissutsit allat eqqarsaatiginiarneqartarput, tamannalu ajornaatsuinnaaneq ajorpoq. Annikitsortat assigiinngitsut politiit oqaaseqannginnerminni erseqqissaqqaarniagaat pineqarsinnaapput, Sten Schaumburg-Müller oqarpoq, nangillunilu:

- Matut matoqqalluinnartuutinneqarnerannut qanoq tunngavilersuuteqartoqarsinnaanera suliami matumani qularutigilaarpara.

Suliammi tamanut soqutiginaateqarnera qularutigineqarsinnaanngilaq, inatsisilerinermik professori oqarpoq.

Aamma suliap matuni matoqqalluinnartuni ingerlanissaa aatsaat pisariaqarluinnarneranik pisinnaasoq, taanna naliliivoq.

- Uanga issiavinniit isigalugu inuiaqatigiinnut akunnakusoorpoq. Tamanna pisariaqarluinnarpat aatsaat atorneqassaaq. Suliat ilaanni pisariaqarluinnarsinnaavoq, kisianni pitsaanernerpaanera atoruminarnerpaaneraluunniit pissutigalugu taamaaliortoqassanngilaq, Sten Schaumburg-Müller oqarpoq.

KNR pasineqartup Eqqartuussisoqarfik Kujallermi sassartinneqarnera najuuppoq, matullu matoqqalluinnartuutinneqarnissaanut KNR akerliugaluarpoq.

Eqqartuussisup oqarnera naapertorlugu matut matoqqalluinnartuutinneqarnissaat illersuisup unnerluussisussaatitaasullu kissaatigaat, taamaammallu eqqartuussisoq akuersissuteqarluni.