Narsamit ilisimannittut: Qulimiguulik qaalersorigaluarparput

Narsap qulimiguulinnut mittarfiani aallaasersortoqarnera nunatsinni tupaatigineqaqaaq.

Inuit marluk eqqorneqarput, inuillu allat pingasut eqqartoqarneranit sequmittunit igalaaminernillu aseqqukunit eqqorneqarput. Ajoqusertut tamarmik inuunerminnik navianartorsiunngillat.

Pisoqarneranik isiginnittut angutip tassanngaannartumik eqqalerneranit misigisaminnik maanna oqaluttuarput.

Igalaaq qupisoq

Air Greenlandip qulimiguulia Narsami qulimiguulinnut mittarfimmut mimmat seqinnerlunilu qilak tungutsorippoq.

Ivalo Motzfeldt Narsarsuarmit qulimiguulimmik minutsit 15-it ilaareerluni tallimanngunngitsiartoq tikippoq.

Ivalo Motzfeldtip oqarnera naapertorlugu mikkamik sanilerisaata qulimiguuliup igalaava qupineqartoq takuaa. Taassuma qupineq assiliniarlugu assiliivini qaqimmagu qulimiguulimmi atortorissaarutit qaararlutik aallartipput.

- Narsamut mereerluta uanga tununngagama, taava saanniittup oqarfigigaminga igalaaq qiviaqqullugu sunaaffa qulloortoq. Taava tassani eqqarsarlunga uanga; når sunaaffa immaqa teknik ajorsimagami arlaatigut mikkatta immaqa igalaaq aserorpoq asuki, taanna KNR-imut oqarpoq.

Ilaasup maskiinakkut ajutoorsorigaa

Taassuma oqarnera naapertorlugu qulimiguullip iluani uippallertoqarpoq:

- Taava eqqarsarlunga ilaalaa tassa helikopter qaalerpoq. Nilliallunga uanga aallartikkama; aniniarta helikopteri qaalerpoq, qitequtera peerniarsariutigalugu, tanna oqarpoq.

Ivalo Motzfeldtip timmisartumi aquttup susoqarnera apeqqutigigaa oqaatigaa, ilaasullu tamatuma kingorna niorarlutik arpalilerput.

-  Tassa tassani aatsaat paasilerparput susoqarnersoq. Taavalu inuuniaammerujussuarluta annanniartariaqarpalulerluta, taannartaa pikkunaaloqaaq.

Ivalo Motzfeldtip ilaaqatinilu inuuniarlutik qanoq iliorsimanertik KNR-imut oqaluttuaraa:

- Ambulancenik ingerlatsisup heliport illutaata tunuani toqqorsimalluni suaartarluni aggeqquvaanga. Taava taamaaleruttortoq aallertussara, kammaga biilinik qummut aallarami. Taava tassanngaannaq aalajangerama; naajj uanga biilinukalerpunga arpaannaq arpaannaq biilinut. Taava ilaaqatigut pingasut aamma nunaannakkut nueriasaaramik, pingasuulluta tassa biilinut ah sisamaalluta, biilinut teqqaatiusaannaq ikigatta matulluanngilarpulluunniit; illoqarfiliaanniartigut aallaasersortoqarpoq, Ivalo Motzfeldt oqarpoq, nangillunilu:

- Tassa uanga qimaasorujussuanngorama annanniaavissortariaqarpalullunga. Aatsaat unnukkut eqqarsaatigilerpara sanngiinnerusortagulluunniit ikiornissaanik eqqarsaateqaavissimanngilanga, kisiat tassa annannissaq.

Kalaallit Nunaanni Politiit Ivalo Motzfeldtip pisumik nassuiaatigisai uppernarsanngilaat.

Meeqqat heliportip eqqaani pississaarfimmi pississaartut pisoqarnerata kingunitsianngua qimagutsinneqartut, Sara Olsen Nielsen oqarpoq. Assi © : Hans-Peter N. Bay

Lastbilinut ikisimasoq

Kalaallit Nunaanni Politiit nalunaaqutaq 16.50 nalunaarfigineqarput. Angut 20-nik ukiulik akunnerup affaa qaangiuttoq tigusarineqarpoq.

Ilinniartitsisoq, Sara Olsen Nielsen Narsami heliportimi pisumi aamma isiginnittuuvoq.

Taannali timmisartumut pingasunngornermi ualikkut ilaasuunani heliportip eqqaani illut ilaanniippoq. Sara Olsen Nielsenilli uia qulimiguulimmut ilaavoq.

- Uiga attavigisinnaanngilara, allatullu iliuusissaqarnanga. Inuilli qulimiguulimmit qimaasut ilaat uppippoq. Taannalu uigigiga kingulliullunilu qimaalluni orlusoq paasinarsivoq.

Sara Olsen Nielsenip ungasinnini pissutigalugu uini takusinnaanngilaa, oqarasuaatikkulli attaviginiaannarlugu:

- Sianerfigeqattaarpara akinerli ajorluni. Namminerli sianerpoq. Lastbilip tunuanut nallarsimalluni oqaatigaa. Tamatumalu kingorna illoqarfiliaanneqarluni, taanna KNR-imut oqarpoq.

Pisumik nassuiaanerit aamma aallaat qanoq ittoq atorneqarnersoq Kalaallit Nunaanni Politiinit aamma uppernarsarneqanngilaq.

Angutip 20-nik ukiullip Qaqortumi Eqqartuussisoqarfik Kujataani sassartinneqarnera sisamanngornermi ualikkut pingasunut aallartippoq.