Narsami aallaasersortoqarnera: Ajoqusertoq mittarfimmi atorfeqarpoq
Air Greenlandimit paasissutissanik ilallugu nalunaaqutaq 12 nutarterneqarpoq.
Mittarfeqarfinni sulisut marluk Narsami pingasunngornermi ualikkut aallaasersortoqarfimmiipput.
Mittarfeqarfimmi pisortaanerup, Henrik Estrupip oqarnera naapertorlugu aappaa igalaamerngit aseqqukuinik eqqorneqarpoq, Narsamilu napparsimmavimmi passunneqarluni.
Henrik Estrupip oqarnera naapertorlugu pineqartut tassaapput mittarfimmi aqutsisoq sulisorlu.
- Taakku ilaasussat aamma niusussat, nassatat qulimiguulimmullu nalunaarutit allallu isumagisarpaat. Kisianni taakkuli saniatigut allanik timikkut ajoqusertoqanngilaq. Kisianni tarnikkut sunnerneqangaatsiarnerat qularnanngilaq, Henrik Estrup KNR-imut oqarpoq.
Air Greenland ajoqusersimasut imaluunniit taakku arlaat Air Greenlandimi sulisuunersoq oqaaseqarfigerusunngilaa.
Narsamit Narsamullu qulimiguulimmik angallassinissat tamarmik unitsinneqarsimasut, Henrik Estrupip KNR-imut paasissutissiissutigaa. Taamaakkaluartorli politiit, Air Greenland Mittarfeqarfiillu Narsamit Narsamullu ippassarli angalalerput.
Aallaasersortoqarnerata nalunaaqutaq tallimat kingorna tusarneranit erngertumik iliuuseqartoqarsimasoq Air Greenlandimi sulisoqarnermut pisortap, Mads B. Christensenip oqaatigaa.
- Nunatta kujataani ilaasutta sulisuttalu najuuffigisaani pisoqarsimanera ilisimaleratsigu maanngaanniit timmisartumik piareersaavugut ajornartoornermilu upalungaarsimanerput aallartillugu. Taanna pingasunut immikkoortuuvoq, taakkulu inuttatsinnut, ilaasutsinnut ilaasunullu attuumassuteqartunut immikkut pisariaqartitsisussanut sammillutik, taanna oqarpoq.
Narsamut immikkut ilisimasalimmik Narsamut paasiniaajartortitsisoqarpoq, tassanngalu immikkut ikiuisoqarnissaa pisariaqartinneqassanersoq nalilerneqassalluni.
Illoqarfiit Nanortallip, Qaqortup Narsallu akornanni angallassinissamut umiatsianik attartorniartoqaleruttortoq qulimiguulillu mikisoq tallimanik ilaasoqarsinnaasoq angallassinissamut pilersaarutinut ilaatinneqartoq, Air Greenlandip KNR-imut paasissutissiissutigaa, qulimiguulillu Narsamut missinnaanngikkarlluarpoq, taamaammat Air Greenland heliportip eqqaani qulimiguulimmut miffiugallarsinnaasumut akuersissutissarsiuleruttorpoq.
Tamatuma saniatigut Narsarsuup umiarsualiviani umiatsiat talinnissaannut siku issuallaarpoq, taamaammat Narsarsuarmut Narsarsuarmiillu qulimiguulik kisimi atorneqarsinnaagarllarluni.
Air Greenlandip Mittarfeqarfiillu sulisuminnut tarnip pissusianik ilisimasalimmik oqaloqateqartoqarnissaa neqeroorutigalugu erseqqissaatigaat.
