Politi: Angut 20-nik ukiulik pinerluttuuvoq

Angut Narsami pingasunngornermi ualikkut aallaasersortoqarneranut atatillugu tigusarineqartoq 20-nik ukioqarpoq.

Kalaallit Nunaanni Politiit KNR-imut paasissutissiipput.

Angut Qaqortumi Eqqartuussisoqarfik Kujallermi sisamanngornermi ualikkut marlunut sassartinneqarpoq.

Sassartitsinermi matut marloqiusamik matoqqatinneqarnerat pissutigalugu aallaasersortoqarneranut suna pissutaanersoq piffissami matumani paasissutissiissutigineqarsinnaanngilaq.

Pinerluffiusumi suli misissuisoqarpoq, tassanilu politiit qanimut misissuillutillu takussutissanik qulakkeeriniarput. Kalaallit Nunaanni Politiit tamatuma saniatigut Danmarkimit pinerluttoqarsimatillugu misissuisartunit ikiorneqarput.

Inuit marluk eqqorneqartut

Narsami qulimiguullit mittarfianni aallaasersortoqarmat angutip 20-nik ukiullip inuit marluk eqqorpai. Taakku tamarmik inuunerminnik navianartorsiunngillat.

Tamatuma saniatigut inuit pingasut ajoquserput. Taakku ajoqusernerat aqerlup eqqugaasa aserornerannit eqqorneqarsimapput.

Mittarfeqarfeqarfimmi sulisut ataaseq taakku ilagaat. Taanna igalaamerngit aseqqukuinik eqqorneqarnerpoq, Narsallu peqqissaaviani passunneqarluni.

Politiit aallaasersortoqarnera pillugu pingasunngornermi nalunaaqutaq 16:50 nalunaarfigineqarput, pinerluuteqartorlu akunnerup affaata qaangiunnerani tigusarineqarpoq.

Politiit piffissami matumani suliamut atatillugu paasissutisseeqqissinnaanngikkallarput.