Aaqqissuussamik hashimik niuerneq pillugu suliami eqqartuussut: Angutit marluk ukiunik arfineq-marlungajannik pineqaatissinneqartut

Eqqartuussisoqarfik Sermersooq angutit marluk aaqqissuussamik hashimik niueruteqarsimasutut unnerluutigineqarneranni suliami ullumi eqqartuussuteqarpoq.

Kalaallit Nunaanni Politiit tusagassiuutinut nalunaarummi allapput.

Suliaq akitsuuserisut containerimik Nuummut marsimi tikittumik misissuineranni aallartippoq, Containerimi tassani hashi 6,8 kiilu nassaarineqarpoq.

Containeri alla apriilimi misissorneqarpoq. Tassanilu hashi 4,9 kiilu nassaarineqarluni.

Containerit Danmarkimit nassiunneqartuupput.

Kalaallit Nunaanni Politiit misissueqqissaarnerat angutit 44-nik 50-nillu ukiullit tigusarineqarnerannik nunatsinnullu hashimik anngiortumik eqqussuisimasutut pasineqarnerannik kinguneqarpoq.

Katillugit ukiunik arfinilinnik qaammatinillu qulinik pineqaatissinneqartut

Politikommissæri, Malik Sandgreen tusagassiuutinut nalunaarummi ima oqarpoq:

- Politiit suliaq aaqqissuussamik pinerluuteqarneq pineqarmat ilungersuussamik suliaraat, aamma akitsuuserisut, Royal Arctic Linep Kalaallit Nunaanni Politiillu akornanni suleqatigiilluarneq nuannaarutigaarput.

- Pinerluuteqartut tigusarineqarnissaat pillugu annertuumik misissueqqissaartoqarpoq.

Angut 44-nik ukiulik hashimik 6,8 kiilumik anngiortumik eqqusseqataasimasutut ukiumi ataatsimi qaammatinilu sisamani piumasaqaatitaqanngitsumik pineqaatissinneqarsimasunut inissiisarfimmiittussanngortinneqarpoq.

Angut 50-inik ukiulik misiliutaasumik iperagaaqqasuuvoq, tassunga pineqaatissiissutigineqartup naammassinissaanut suli ukiunik pingasunik sinneqarpoq. Tassa imaappoq pineqaatissiissutigineqarsimasumit ukiut pingasut suli amigaatigai.

Taakku ukiut pingasut ilanngunneqarput, taamaammat hashimik katillugit 11,8 kiilup missaaniittumik anngiortumik eqqusseqataasimasutut ukiuni tallimani qaammatinilu arfinilinni piumasaqaatitaqanngitsumik pineqaatissinneqarsimasunut inissiisarfimmiittussanngortinneqarpoq.

Angutip hashi containerimut aariaraluaraa

Kalaallit Nunaanni Politiit containeri hashimik 6,8 kiilumik imaqartoq Nuummut tikimmat imarisaa angummit 34-nik ukiulimmit aaneqariaraluartoq paasissutissiissutigaat.

Angut tigusarineqarpoq, sassartinneqarlunilu. Suliaq tassunga tunngasoq suli eqqartuussutigineqanngilaq, angut suli tigummigallarneqarpoq.