KNAPK Aalisartut suliffiup saniatigut kajumissutsiminnik sakkutuujunissamut piareersimasut

Nunatsinni hjemmeværneqalernissaq, tassa suliffiup saniatigut kajumissutsimik sakkutooqalernissaq danskit naalakkersuisortaavisa sulissutiginiaraat, naalakkersuisunngortitsinermi tunngavigineqartumi allaqqavoq.

Nammineq kajumissutsiminnik sakkutooqarnissaq qanoq ilusilersorneqassanersoq suli aalajangiunneqanngikkaluartoq, Nunatsinni aalisartut piniartullu peqataanissaat pissusissamisoortoq, KNAPK-p siulittaasua Henrik Sandgreen isumaqarpoq.

- Inuttut piginnaanngorsarnissamut aqqutitsialassuusoq aamma periarfissatsialassuusoq eqqartorneqartareerpoq. Taamaammat uanga isumaqarpunga, taamatut pilersitsisoqassappat inuiaqatigiittut katitigaanitsinni ajoqutiginavianngikkipput, Henrik Sandgreen oqarpoq.

Imaq nalunngikkaat

Aalisartut piniartullu immami angalasorujussuusarput, taamaammallu ujaasisarnernut annaassiniartarnernullu sulianut tapertaalluarsinnaasut, KNAPK-mit isumaqartoqarpoq.

- Angallavigisaminni issittumi, sermernartuni allatullu angalanermi aammalu sila ajortumi angalasarnerni misilittagaqartuupput, taamaammallu tassuunakkut ineriartortitsinermi assigiinngitsorpassuarnik tunniussaqarsinnaasut qularutissaanngilluinnarpoq, Henrik Sandgreen oqarpoq.

Suliffiup saniatigut kajumissutsimik sakkutooqarnissap Issittoq pillugu nalunaarusiami ukioq manna innersuussutigineqarnera pissutigalugu danskit naalakkersuisortaavisa isumaqatigiissutaanni ilanngunneqarmat tamanna oqallisaalerpoq.

Annertuumik pisoqartillugu ikioqataasinnaasut

Nunatsinnilu nammineq kajumissutsiminnik qanoq sakkutooqartitsisoqassanersoq suli aalajangerneqanngikkaluartoq, qatserisartut peqataatinneqarnissaat isumassarsiaalluartoq Kalaallit Nunaanni Qatserisartut Peqatigiiffianni siulittaasoq, Poul Olsen ilaliivoq.

- Assersuutigalugu aatsitassarsiornerit annertusiartuinnassappata, tassani piareersimaffissat amerlasuut eqqarsaatigalugit, soorlu umiarsualivinni atortussat immaqa ulorianaateqarsinnaasut tikittalertussaassapput. Taakkunanilu arlaatigut ikuallattoqalissagaluarpat, annertuumik pisoqalissagaluarpat qatserisartuninngaanniit Maniitsumit allaniilluunniit qanittuminngaanniit tikititsipallaannarsinnaanngilagut, Poul Olsen taama oqarpoq.

Namminneq kajumissutsiminnik sakkutuussat qatserisartunut ikiuuttassappata piareersarneqaqqaartariaqassasut, Poul Olsen isumaqapoq.

- Qatserisartutut pujorsiortutut ingerlasinnaalernissaat minnerpaamik qulakkeerneqartariaqarpoq, Poul Olsen taama oqarpoq, nangillunilu.

- Qaqqani ujaasinerni annaassiniaanernilu piginnaanngorsarneqarnissaat tulluartutut ilaassaaq, Kalaallit Nunaanni Qatserisartut Peqatigiiffianni siulittaasoq, Poul Olsen oqarpoq.