Issittoq pillugu nalunaarusiaq Qujaukitsup naammagisimaarpaa
Ilaatigut hjemmeværnimik, tassa sakkutuujunngitsut illersornissaqarfiup suliassaasa ilaannik suliaqartartussanik, pilersitsinissaq Namminersorlutik Oqartussanit tapersersorneqarpoq.
Ilaatigut aalisartut piniartullu sakkutuujunngikkaluarlutik illersornissaqarfiup suliassaasa ilaannik suliaqartarnissaat Qujaukitsup takorloorpaa.
- Illersornissaqarfimmi suliassat ingerlanneqartunit kalaallinit anneruleraluttuinnartumik kivinneqarnissaat nalunaarusiami ilaatigut ujartorneqarlunilu tikkuarneqarpoq. Nammineq kajumissusertik aallaavigalugu killeqarfiup nakkutigineqarneranut Naalaagaaffiullu innarlerneqannginnissaanut umiarsunarik nakkutilliinermut assigiinngitsorpassuartigullu suliassanut Kalaallit Nunaata annerusumik akooqataanissaa ilaatigut tikkuarneqarpoq, Nunanut Allanut tunngasunut Naalakkersuisoq, Vittus Qujaukitsoq taama oqarpoq.
Aamma atuaruk Illersornissaqarfiup Issittumi suliniutai nukittorsarneqarlik
Taanna naapertorlugu Nunatsinni sakkutooqarnerulissanngilaq.
- Ernumanissaq pissutissaqanngitsoq aamma sakkutooqarnikkut Issittumi annertusaasoqarneratut uanga isiginngilluinnarpara. Kalaallit annerusumik sakkutooqarnerup iluani suliassanik kivitseqataanissaat taasani pineqarmat, taamaattumik sakkussiornikkut annertusaaniarnertut oqaatigerusunngilluinnarpara, Vittus Qujaukitsoq KNR-imut oqarpoq nangillunilu kalaallit illersorneqarfimmi suliani akuunerulernissaat aamma eqqarsaataasoq oqaatigalugu.
Aamma atuaruk llersornissaqarfiup Issittumi suliaqarnera nikittorsarneqalersoq
Nalunaarusiarlu ukiut marluk matuma siorna suliarineqalermat kalaallit peqataatinneqarlutik suleqataasimanerat Vittus Qujaukitsup nuannaarutigalugulu naammagisimaarpaa.
- Nalunaarusiap inerniliinera inassuteqaataalu ataatsimut isigalugit naammagisimaarluinnarpagut, aamma isumaqarpugut nunarput nalunaarusiap suliarineqarnerani akuutinneqarlunilu tusaaniarneqarsimanera naammagisimaarnarluinnarpoq, Vittus Qujaukitsoq oqarpoq.
Danskit illersornissamut ministeriat peqatigalugu Vittus Qujaukitsup nalunaarusiaq Københavnimi ataasinngorpat tamanut saqqummiutissavaa.
Issittumi suliat annertusarnissaannut Danskit naalagaaffiat aningaasaliisuussasoq Vittus Qujaukitsoq oqarpoq.
