Naaja Nathanielsen upalungaarsimasunik sakkutooqalerusuppoq
Danskit illersornissamut ministereqarfiata sakkutooqarneq pillugu ilisimatusarfik peqqusimavaa, Kalaallit Nunaanni upalungaarsimasunik nammineq piumassutsiminnik suliaqartartussanik pilersitsisoqassappat qanoq iliortoqarsinnaaneranik misissueqqullugu.
Sakkutooqarneq pillugu ilisimatusarfiup nalunaarusiaa qaammammi uani pisortatigoortumik saqqummiunneqarpoq, pivisunngortinneqarsinnaaneranullu periarfissat ajunngilluinnartuusut nalunaarusiami inerniliunneqarpoq.
IA sinnerlugu inatsisartunut qinigassanngortittup Naaja Nathanielsenip nalunaarsiap inerniliussaa iluaraa, inatsisartunullu qinigaassaguni suliniutiguniarpaa.
Sakkutuujunngitsut aamma politiiunngitsut maani najugaqartut upalungaarsimanermik avatangiisitsinnillu isumaginninnermik peqataatinneqarsinnaannginerat pakatsissutigisarpara, Naaja Nathanielsen oqarpoq.
Nunani allani misilittagaqarfigineqarluartoq nunatsini innutaasunut piukkunnarpoq, taakkua misilittagaat Kalaallit Nunaanni upalungaarsimasunik pilersitsinissamut ilanngullugit Naaja Nathanielsen oqarpoq.
Kalaalllit Nunaani upalungaarsimanermik suliaqartut sulerisassanersut Naaja Nathanielsen aperaarput.
- Atortunik inunnillu annaassiniarnernut ikiuuttarsinnaapput. Uuliamik maqisoortoqassappat ikiuussinnaapput. Taakkua najukkami ajutoortoqarpat piaartumik ikiuuttarsinnaapput. Sineriatta minguitsuutinnissaanut ajunaalersunillu ikiuussinnaanitta atorfissaqartinneqartutut misigimalertissavaatigut, Naaja Nathanielsen oqarpoq.
Sakkutooqarneq pillugu ilisimatusarfiup nalunaarsiaani isumassarsianut ilaapput, najukkap imartaata mingutsinneqannginnissaanik illersuisussat aamma tunup avannaani nakkutiginnittut Sirius'ikkut suliaasa annertusineqarnissaat kiisalu sakkutuut naalagaaranngorniat ilinniarfiannik Kalaallit Nunaanni immikkoortortaqarfeqalernissaq isumassarsianut ilaapput.
Isumassarsiat assigiinngitsut akimikkut assigiinngissuteqarput, soorlu ilinnialernissamut piumasaqaatit aamma aaqqissorneqarnissaannut ilusilersuinerit assigiinngiiaarlutik. Aallaaviusorli tassaavoq, Kalaallit Nunaanni upalungaarsimasunik pilersitsinissaq taakkuninngalu suliaqartussat Danmarkimi upalungaarsimanermik suliaqartut nammineq piumassutsiminnik suliartuunissaat.
Nammineq piumassusertik aallaavigalugu upalungaarsimanermik inuit suliaqalernissaat qanoq qulakkeerneqarsinnaanersoq Naaja Nathanielsen aperaarput.
- Innuttaasut akissussaaqaataanerat annertooq takusarparput, soorlu kattuffiit suliniaqatigiiffiit peqatigiiffiillu suliniuteqartarnerisigut. Ullumikkut sorpassuit ingerlalluarput, nammineq piumassutsiminnik suliaqartut pissutaallutik Naaja Nathanielsen oqarpoq.
Isumaqarpunga amerlasuunit soqutigineqassasoq, tassami najukkami ilisimasat pineqarpata pinngortitaq avatangiiserlu pineqarangata soqutigisarparput , taakkua sulinngiffeqarnitsinni najortaratsigit Naaja Nathanielsen oqarpoq.
Sakkutooqarneq pillugu ilisimatusarfiup nalunaarusiaa Kalaallit nunaanni inuiaqatigiinni aalajangikkanik atortitsineq danskit partiivinut illersornissaq pillugu isumaqatigiissuteqarsimasunut tunniunneqarpoq.
Kunngeqarfiup iluani issittumi iliuusissami, atuarneqarsinnaavoq, Kalaallit Nunaata Danmarkillu kissaatigigaat, Kalaallit Nunaanni innuttaasut danskit illersornissamut suliaasa ilaannik suliaqassaassut, suliassat Kalaallit Nunaanni suliassappata.