Aalisartut politikkerisulli akerleriilerput
Aalisarnermut Naalakkersuisoq Nikkulaat Jeremiassen pisassiissutitaqanngitsumik qaleralinniartarnerup unitsinneqarnissaanik siunnersuuteqarpoq. Parteeqataasali Siumumeersut siunnersuut akerleraat.
Naalakkersuisoq Ilulissani aalisartut piniartullu peqatigiiffiannit tapersersorneqarpoq.
- Nikkulaat Jeremiassenip taamatut isummersuutigisimasaanut maanngaanniit isumaqatigivarput taamatut pisoqassappat, IAPP-mi ilaasortaq ukiorpassuarnilu siulittaasuusimasoq Peter Olsen KNR-imut oqarpoq.
Kisianni Sinerissap Qanittuani Aalisartut Piniartullu Kattuffiat akerliuvoq.
- Una ukiunut kingullernut qaangiutereersunut utersaarnertut taasariaqarpoq, SQAPK-mi pisortaq Erik Lange KNR-imut oqarpoq.
Nikkulaat Jeremiassen saqqummiussinermini aalisarnerup nakkutigineqarluni aqunneqarnerulernissaa siunertaralugu oqarpoq.
AAMMA ATUARUK Pisassiissuteqarfiunngitsumik aalisarfiit akerleriissutaalersut
Pinngortitaleriffimmiillu tamatumani ilalerneqarpoq.
- Killeqanngitsumik aalisarfiit atorunnaarsinneqarpata, imartat aalisagartassissuteqarfiusut pisassiissutissatullu inassutigineqartut imminnut naapertuutilissapput, aalisakkat pillugit ilisimatooq Rasmus Nygaard taama oqarpoq.
Kisianni qaleralinniarnermik aqutsinerulerneq aqutsiviusimanngitsuni aalisarunnaarnermik kinguneqartariaqanngitsoq, Nikkulaat Jeremiassen erseqqissaavoq.
- Uani tusarniutigineqarnerani pineqarpoq pisassiivinngortinneqarsinnaanerat, imaanngitsoq tassani aalisarunnaarsitsisoqarniartoq, Nikkulaat Jeremiassen sisamanngormat Qanoruumut taama oqarpoq.
Killeqanngitsumik qaleralinniarsinnaatitaaneq aqutsiveqarfinni Upernavimmi, Uummannami Qeqertarsuullu tunuani Inatsisartuni amerlanerussuteqartunit 2014-imi akuersissutigineqarpoq.