Politikki

Aalisarnermut naalakkersuisumut tatiginnikkunnaartoqaraluarpoq

Aalisarnermut piniarnermut nunalerinermullu naalakkersuisumut, Karl Kristian Kruse-imut tatiginnikkunnaarnermik taasisitsinissamik, Inuit Ataqatigiit ualilluinnartoq siunnersuuteqaraluarput.

Allattoq Apollo Jeremiassen, Jens Thorin

novembarip 27-at 2015 18:42

Naalakkersuisup avaleraasartoortassanik qinnuteqaatinik suliaqarnerup nalaani, KNT-imut attuumassuteqarpallaarsimanera tamatumunnga peqqutaavoq.

Inuit Ataqatigiit politikkikkut oqaaseqartartuata, Aqqaluaq B. Egedep tunngavilersuinermini Naalakkersuisup avaleraasartoortassinnissamut suliami ullut akuuffigisimasai tulleriiaarlugit taakkartorpai.

Tassalu KNT-p qinnuteqaataa Naalakkersuisut januarip 19-ani tigummassuk, Karl-Kristian Kruse akuunerarlugu, Aqqaluaq B. Egede oqarluni.

Tunisassiorfimmut KNT Aps-imut Karl-Kristian Kruse avaleraasartuut pillugit qinnuteqaatiti aallartinneranni, piginneqataavoq.

Aamma atuaruk Avaleraasartuunik agguaassinermi Kielsenip Kruse tatigaa

Aamma atuaruk Avaleraasartoortassanik agguaassinermi sinaakkutissat Krusep siuttuuffigai

Naalakkersuisoq suliamut attuumassuteqarpallaartoq, maajip arfineq pingajuani Aalisarnermut Naalakkersuisoqarfimmit ilisimatitsissutigineqarpoq, kisianni Naalakkersuisup sulinini tamatuma kingorna ingerlatiinnaraa, IA-meersup tikkuarpaa.

Taava avaleraasartortassissutissanik qinnuteqaaatit maajip 14-ani piareermata aatsaat attuumassuteqarpallaarnini pissutigalugu suliassaq iperaraa, Aqqaluaq B. Egede Inatsisartut Oqaluttarfianniit oqarpoq.

Kisianni Demokraatiniit Michael Rosingip, Naalakkersuisoqatigiit sinnerlugit tatiginnikkunnaarluni taasinissamik siunnersuut itigartinneqassasoq nalunaarutigaa. Tassalu taamaalilluni tamanna taasissutigineqarani.

Nutaarsiassami kukkunermik nassaarsimaguit uunga allaffigineqarsinnaavugut.