Aalisarneq pillugu isumasioqatigiittoqarnissaa Aleqa Hammondip piumavaa
Nunatsinni aalisartuunerup iluani, sinerissap qanittuani avataasiorluniluunniit aalisarneq eqqarsaatigalugu, unammilligassat annertuut matumani innersuussutigalugit. Tulleriiginnarlugillu taagorpai, tunisassiorfiit ingerlanerliortut, sulisussaaleqineq, saarulliit akiluttorfigineqarnerat kiisalu akitsuutit nutaat eqqunniarneqartut.
Taamaammat aalisarnermik inuussutissarsiuteqartuusut sinniisorisaalu piaarnerpaamik isumasioqatigiinnissamut aggersarneqarnissaat piumasaraa, taamaaliornikkut aalisarneq pillugu inatsit oqaluuserineqarsinnaassammat, akit appasinnerpaaffissaat pillugu apeqqummik oqaluuserinnittoqarsinnaassammat, matumani suliffissuarni tunitsivinnilu sulisoqarnikkut anguniakkat eqqartorneqarsinnaallutik. Ilutigisaanik Royal Greenlandip siulersuisuini KNAPK-p aamma SIK-p ilaasortaatitaqalersinneqarnissaat aamma piumasaraa. Siunissami aalisarnerup qanoq ingerlanneqarnissaa pillugu ersarissunik anguniakkanik inerniliilluni isumasioqatigiinneq naggataatigut naammassisaqarfiussaaq, Naalakkersuisunut saaffiginnissutimini Aleqa Hammond ilaatigut allappoq.