Politiit ullormut nalunaarusiaat: Aalakoortoq unnuisarfimmut Hotel Nordbomut aportoq, biilertilluni tunuarsimaffissami ajutoorneq biilillu marluk aallarunneqarsimasut
Poltiiit ullup siulia ulapiffigisimavaat, pingaartumik biilinik tillinniarnerit aalakoortillutillu biilertut, tallimanngornermi arfininngornermilu immikkut eqqaaneqarsinnaallutik.
-Nuummi sinerissamilu unnuaq ulapiffiungaatsiarpoq. Imigassartorsimanermut attuumassuteqartumik pisut suliassat amerlasimapput, nunatsinni politiit pigaartuisa pisortaat Jørgen Madsen oqarpoq.
Nalunaaqutaq unnuakkut sisamanngulaartoq inuusuttut marluk aalakoortut Nuummi unnuisarfiup illutaanut aporput, apornermili inunnik tigusarinnittoqaranilu aqqunartoqarsimanngilaq .
Nuummilu biilertilluni angut aalakoortoq, unnuap ingerlanerani tingusarineqarpoq, aaversereernerullu kingorna iperagaaqqippoq.
Allalu pisoq, unnuap ingerlanerani Nuummi biilit aallarunneqarsimasut nalunaarutigineqarput.
-Sukkasoorujussuarmik suliaq naammassineqarpoq. Ingerlaannaq biilit ujartinniarlugit aggertitsivugut. Nalunaarutiginnittoq nammineerluni ujaaseqataavoq biilillu nassaaralugit, nunatsinni politiini pigaartuisa pisortaat oqarpoq.
Tassungalu atatillugu tigusarinnittoqanngilaq, biilit aallarunneqarsimasutut nalunaarutigineqartut, aallarussisuniit qimanneqareersimasut nassaarineqarmata.
Sinerissamilu ulapputtoqarsimavoq
Ullaaq arfineq pingasup qaangilaarnerani, Sisimiuni biilinik ajutoortoqarpoq. Ajutoornerli imigassartortoqarsimaneranut attuumassuteqanngilaq.
-Biilertilluni tunuarsimaffissami tunuarsimaartoqarsimannginneranik peqquteqarpoq, biilillu allat tassani aporneqarsimapput, Jørgen Madsen oqarpoq.
Ajutoortoqarnerani aqqunartoqarsimanngilaq, kisiannili biilit aseruiffigineqarsimapput.
Ullaaq arfineq pingasup missaani, Qaqortumi biilit aallarunneqarsimasut nalunaarutigineqarpoq, biililli nassaarineqaqqissimapput. Biilit nassaarineqartut inoqanngimmata tigusarinnittoqarsimanngilaq.