Aajap suleqatigiinnissamik isaassineq tikilluaqquaa
Taassuma naqissuserpaa, folketingemut ilaasortat taakkununnga ilaallutik siusinnersukkut Siumut aamma IA sinnerlugu Folketingemut ilaasortat, kalaallit Danmarkimiittut atugaasa pitsaanerulernissaanik suliniuteqarluarsimammata.
- Isumaginninnermut Naalakkersuisup taamatut saqqummiussinera ajunngitsuusoq isumaqarpunga.
Aamma atuaruk NALUNAARUSIAQ Aleqa Hammond: Inuttut pisinnaatitaaffinnik unioqqutitsineruvoq
Danmark akisussaasuusoq Martha Lund Olsenip siornatigut oqaatigereerpa, nuannaarutigaaralu maanna Kalaallit Nunaata suleqataasariaqarneranik ammaassimmat, kalaallit Danmarkimiittut ikiorneqarsinnaanngillat Kalaallit Nunaani pissutsit qiviaqqaartinnagit, Folketingemut ilaasortaq Aaja Chemnitz Larsen IA oqarpoq.
Aamma atuaruk Kalaallinik immikkoortitsineq ullutsinni tulluanngilaq
Kalaallit Danmarkimut nuussimasut atugaasa pitsaanerulernissaannik kalaalit folketingemi ilaasortaatitaannit suliniutigineqartarsimapput.
Assersuutigalugu Aaja Chemnitz Larsenip folketingemi siunnersuutigaa, Danmarkimi kommuneni kalaallinut sullissivinnik pilersitsisoqassasoq, kommuuniminni kalaallinut sullissisussanik.
- Siunnersuutigereerpara 8 millionit koruuninik immikkoortitsisoqassasoq, kommunit naalagaaffimmut qinnuteqarfigisinnaasaannik taakkua kommuneni kalaallinut sullissivinnik pilersitsinissamut atugaasanik, Aaja Chemnitz Larsen oqarpoq.
Aamma atuaruk NALUNAARUSIAQ Danmarkimi kattuffiup Inuit peqatigiiffiullu Ikerasaap ikinnerussuteqalernissaq isumaqatigiinngissutigaat
Taassuma erseqqissaatigaa, kalaallit folketingemi siornatigut ilaasortaatitaannit IA-mit Siumumiillu, kalaallit Danmarkimut nuussimasut atugaasa pitsaanerulernissaannik suliniutinik arlalinnik suliaqarsimammata.
- Assersuutigalugu kalaallit Danmarkimi inuiaqatigiinni akuunerulernissaannut suliniutinut IA immikkoortitsisimammat, taakkualu maanna aallartinneqalersut Aaja Chemniz Larsen oqarpoq.
- Neriuuteqarluartorujussuuvunga taakkuami kalaallinut Danmarkimiittunut amerlasuunut atorluarneqarsinnaammata, Aaja Chemnitz Larsen oqarpoq.
Aamma atuaruk Kalaallinik immikkoortitsineq ullutsinni tulluanngilaq
Aaja Chemnitz Larsenip folketingep kalaallit nunaat pillugu ataatsimiititaliaanut kaammattuutigisimavaa, kalaallit Danmarkimut nuussimasut atugaat pillugit tusarniaasoqassasoq.
- Kalaallit Nunaat pillugu ataatsimiititaliap tusarniaasitsinissaa neriuutigineqarsinnaavoq, suliniutinik ataatsimoortunik ukiuni arlalinni atorneqarsinnaasumik sanasoqassammat, suliniutit assigiinngitsut suliarineqarlutik, taamaaliornikkut qulakkeerneqassammat, kalaallit Danmarkimiittut siunissami assigiinngisitsinermik pineqassanngimmata.
