NALUNAARUSIAQ Danmarkimi kattuffiup Inuit peqatigiiffiullu Ikerasaap ikinnerussuteqalernissaq isumaqatigiinngissutigaat

- Amerlasuut ammut isigineqareertigalutik suli annerusumik taama misigisimalissapput, Aarhusimi peqatigiiffiup Qaannap siulittaasua, Inuit kattuffiannilu allattaasoq Chartlotte Nebel Pedersen taama isumaqarpoq.

Aamma atuaruk Kalaallinik Danmarkimiittunik assigiinngisitsisoqarpoq

Ikerasaap siulittaasua, Juusi W.Petersen ikinnerussuteqartutut inissinneqaraanni, Danmarkimi kalaallit paaqqinnittarfiinnik atuarfinillu pilersitsisinnaaneq periarfissaanik ammaasasoq junimi oqarpoq.

Inuit pisinnaatitaaffi pillugit ilisimatusarfiup unnersuussutaa tassalu kalallit Danmarkimiittut naalagaaffimmi ikinnerussuteqartutut inissinneqarnissaat kalaallinik mattussiinnarsinnaavoq, tassami taamatut inissinneqassagunik immikkut suliffeqarfiliorsinnaalissagamik.

- Inunnit uagut isumaqarpugut, kalaaliaqqanut immikkut atuarfiliorluni, immikkullu meeqqeriviliorniaraanni ilaqutariit kalaallinit kingoqqisut inuiaqatigiit danskit akornannut akulerunnavianngillat, tamatumaliuna anguniarnissaa sulissutigigipput.

Aamma atuaruk Inuiattut ikinnerussuteqartutut inissisimalernissaq ministerip itigartippaa

Inuit Kattuffianni isumaqarput taarsiullugu Danmarkip Kalaallit Nunaatalu assigiinngissutaat pillugit paasititsiniaanerusariaqartoq - ilaatigut kalaallinut avalannginnerini danskit inuiaqatigiit qanoq aaqqissuussaanersut paasitsiniaanikkut.

Aammalu danskit oqartussaasuinut paasitsiniutigalugu Kalaallit Nunaanneersuuneq qanoq innersoq.

- Nunaqqativut ammasuunermikkut akulerulluarsinnaanerujussuupput, naalagaaffimmi ikinnerussuteqartutut inissikkaluarutta ilaanaasiit eqqarsaannartassapput: "Nå, taakkuaasit kalaallit - taakkuupput ikinnerussuteqartut" Kattuffiup Inuit allattaa Charlotte Nebel Pedersen oqarpoq.

Aamma atuaruk Aleqa Hammond: Inuttut pisinnaatitaaffinnik 

Kattuffiup Inuit siulittaasuat Bitha Mittelmann siusinnerusukkut oqaaseqareerpoq, nuannaarutigissagaluarini kalaallit " inuiaqatigiinni danskini immikkut inissisimalernissaat" taamaalillutillu kalaallit Danmarkimiittut pisariaqartitaat ersarinnerulissagaluarmata.

Peqatigiiffiulli tassa naalagaaffimmi ikinnerussuteqartutut inissisimalernissaq tapersersunngilaa.