Kalaallinik immikkoortitsineq ullutsinni tulluanngilaq
Kalaallit Danmarkimi najugaqartut pisortanut saaffiginninnermi isumannik pigiliuteriikkanik nalaanneqartarnerat, inuit pisinnaatitaaffii pillugit Danmarkimi ilisimatusarfimmi misissuisitsinermi qulaajarneqarpoq.
Aamma atuaruk Kalaallinik Danmarkimiittunik assigiinngisitsisoqarpoq
Nalunaarusiaq takussutissatut atorlugu nunatsinni Naalakkersuisut aamma folketingemi ilaasortat iliuuseqartariaqalersut isumaginninnermut Naalakkersuisoq Martha Lund Olsen, ulluni makkunani Danmarkimiittoq, oqarpoq.
- Immikkoortinneqartarneq ullutsinni tulluutinngilluinnarpoq, kalaalerpassuuvugut maani Danmarkimi najugaqartut ingerlalluartut, taamaattumik Danmarkimi immikkut isigineqartarnerput tulluutinngilaq ullutsinni, Martha Lund Olsen oqarpoq.
Danmarkimi kalaallit pisortanut saaffiginittut immikkut pineqartarnerat ukiuni arlaqartuni ilisimaneqarpoq, naalakkersuup unnerpaa.
Aamma atuaruk Kalaallinik Danmarkimiittunik assigiinngisitsisoqarpoq
Taamaammat kalallit Danmarkimiittut inuuniarnikkut ajornartorsiortut pillugit danskit inooqataanikkut ajornartorsiortut pillugit siunnersuisoqatigiivisa 2013-imi ataatsimeersuartitsimmata, tassanngaanniit inassuteqaatit maanna piviusunngortinneqartariaqalersut, isumaginninnermut naalakkersuisoq isumaqarpoq.
- Danskit inooqataanikkut ajornartorsiortut pillugit siunnersuisoqatigiivisa 2013-mi inassuteqataat, ingerlateqqinneqartariaqarpoq danskit naalakkersuisuinut apuuteqqillugu, ilumut kalaallit danmarkimiittut iliuuseqarfigineqartariaqarnerat pillugu, Martha Lund Olsen oqarpoq -
- qallunaajunnginnatta kalaalliugatta taanna aallaavigalugu immikkut sullinneqarnissarput pisariaqartinneqarmat, isumaginninnermut naalakkersuisoq oqarpoq.
Qallunaat kalaallinut isummiuteriikkanik pineqatarnerat allangortinniarlugu kalaallit Naalakkersuisui aamma folketingemut ilaasortat suleqatigiittariaqartut, isumaginninermut naalakkersuisoq oqarpoq.
- Maani folketingemi ilaasortaatitagut aamma Naalakkersuisut suleqatigiilluta, qallunaat kalaallinut isiginnattariaasiat allanngortinniarlugu suliaq aallartinneqartariaqarpoq ataatsimoorfeqarluta, taamatut siunertaqartumik.
Aamma atuaruk NALUNAARUSIAQ Danskit isumaginninnermut ministeriat: Kalaallit Danmarkimiittut ikioqatigiittariaqarput
Naalakkersuiusunut ilaasortap Martha Lund Olsenip danskit isumaginninnermut ministeriat Karen Ellemann ajornartorsiut pillugu saaffiginiarpaa.
- Danskit isumaginninnermut ministeriannut Karen Ellemannimut attaveqassamaarpunga, aasaq aamma oqaloqatigiipput, unalu aallaavigalugu oqaloqatigiissallugu isumaqarpunga.
Ilaqutarinnermut naalakkersuisoq Martha Lund Olsen ulluni makkunani Danmarkimittoq taama oqarpoq