Aajap qinigassanngortinniartut siusinnerusukkut qineqqusaarnissamut kajumissaarai
Partiit Folketingimut sassartitassaminnik suli saqqummiussinianngikkallartut, Folketingimut maanna ilaasortap Inuit Ataqatigiinneersup Aaja Chemnitz Larsenip qinigassanngortinniarluni kisiartaalluni nalunaarutigereerpaa.
AAMMA ATUARUK Folketingimut qinigassanngortittoq maannamut ataasiinnaasoq
Tamannalu iluaqutissartaqarsinnaavoq. Taamaaliornikkummi kisiartaalluni qinersisartunut saqqumilaassagami.
Aappaatigulli kisimiilluni oqallinnermik pilersitsinissaq ajornakusoorpoq. Qinersisartullu taamaalillutik qinigassanngortittut assigiinngitsut Folketingimut ilaasortaaffimmik qanoq atuiniarnersut paasisinnaassanngilaat.
- Allat sassarumaarnerat qularutiginngilluinnarpara. Ungasinngitsumili taamaalioqqullugit kaammattuutigissavara, namminermi pingaartitat partiillu Folketingimi politikkiata saqqummiunnissaat pingaaruteqartupilussuuvoq. Taamaammat sassarnissap utaqqissunnera sivitsoriartortillugu, kisimiillunga saqqumilaarnissara aamma sivitsoriartuinnassaaq, Aaja Chemnitz Larsen oqarpoq.
Kisiartaalluni sassarneq siuaqqanertut isigineqarsinnaanngilaq
Nunatsinni partiit Folketingimut sassartitassatik ileqquusoq malillugu qinersinissap suaarutigineqarnerani aatsaat saqqummiuttarpaat – tamannalu nalinginnaasumik ulloq qinersiffissaq sapaatit akunnerinik pingasunik sioqqullugu pisarpoq.
Tamannalu qinersisartunut ajoqutaavoq, qinigassanngortittummi anguniagaat piffissaq sivikitsuinnaq atorlugu paasiniartussanngussammatigik, Aarhusip Universitetiani qinersisarnermik ilisimatusartoq, Rune Stubager, taama naliliivoq.
AAMMA ATUARUK Qinigassanngortittut ilisimasaqarfiginnginneri qinersisartunut unammillernartuuvoq
Aamma nunatsinni politikerit marluinnaat Folketingimut qinigaasarnerat qinersisartut malinnaaniarnerannut ilungersunarnerulersitsiinnartarpoq. Folketingimummi nunatsinni qineqqusaarneq taaamaalilluni politikkikkut assigiinngissutaasut pinnagit inunnut ataasiakkaanut saaqqajaalersarmat.
- Tuluit Nunaanni Amerikamilu aaqqissuussinermut assingusupilussuuvoq, nunani taakkunani qinersivinni ataatsimi ataasiinnamik qinigaasoqartarmat. Kalaallit Nunaanni qinigaasussat marluupput, taamaammat Danmarkimi qinersisartut pissuserisartagaannut naleqqiukkaanni, naatsorsuutigisariaqarpoq qinigassanngortittut kikkuuneri sammineqarnerussasoq, Rune Stubager oqarpoq.
Aaja Chemnitz Larsenilli maannamut kisiartaalluni sassarnermigut siuaqqasutut oqaatigisinnaannginnerarpaa.
- Allanik sassartoqarpat, assersuutigalugu Kalaallit Nunaanni politikeritut allatigulluunniit ilisimaneqarluareersunik – taava taakku aamma Aaja Chemnitz Larsenip saqqumilaarneratulli inissipallassajunnarsipput, Rune Stubager oqarpoq.
AAMMA ATUARUK Nunarput Christiansborgimi sammineqarluartoq
Folketingimut qinersineq ukioq manna juunip ulluisa 17-iat nallertinnagu pissaaq.
