Folketingimut qinigassanngortittoq maannamut ataasiinnaasoq
Folketingimut qinersinissaq qanilligaluattualerpoq maannamulli Inuit Ataqatigiinneersoq Aaja Chemnitz Larsen kisiartaalluni qinigassanngortinniarluni nalunaarsimasuuvoq.
Partiilli ilaat qinersisoqarnissaanut piareersarlutik aallarteriivissimapput.
- Folketingimut ilaasortaatitaqarpugut pikkorissumik, aammalu taanna Aaja Chemnitz Larsen sassaqqinnissaminik oqariartuuteqarnikuuvoq ukiarli. Taannalu sassartussaavoq. Sassartussat sinneri piffissanngorpat aamma tusarumaarpasi, Inuit Ataqatigiit siulittaasuat, Múte Bourup Egede taama oqarpoq.
Taassuma oqarnera naapertorlugu Aajap folketingimi issialeramili angusimasani suli nangeqqikusullugit naalagaaffeqatigiinnermut attuumassuteqartunik pitsanngorsaaqqinnissamik siunertaqarpoq.
AAMMA ATUARUK Folketingimi sunniuteqarsinnaaneruvunga
- Angusagut assigiinngitsut, aammalu folketingimi suliarisariaqartut nunatsinni atukkat. Pingaartumik naalagaaffiup suli ingerlataanut tunngasut pitsanngorsarnissaanut. Pitsaanerpaarpaamik inuiaat kalaallit atugaqarnissaanik qulakkeerinninnissamik ilaatigut imallit piareersarnitsinni ilaatigut ilaapput, Múte Bourup Egede taama oqarpoq.
Nunatta qitornai, Partii Naleraq, suleqatigiissitsisut aamma Atassut qinersinissaq suaarutigineqartinnagu suut qineqqusaarutigineqassanersut kikkullu sassassanersut oqaaseqarusunngillat. Aamma partiit naalakkersuisuutitaqartut annersaannit, Siumumiit, taama oqarput:
- Tassa soorunami suaarutigineqarpat qinersinnisaq. Aamma taamaalilluta kikkut sassassanersut nalunarnavianngilaq taamanikkussamut, Siumup siulittaasua Kim Kielsen taama oqarpoq.
AAMMA ATUARUK Aaja Folketingimut qinigassanngorteqqinniartoq
Kisianni Demokraatinit folketingimut qinersinissamut anguniakkanik ersarissunik piareersaasioreersimapput. Takkummi politeeqarnermut inatsisit angerlaassornissaat sulissutigerusuppaat.
- Politeeqarnernup tungaatigut ingerlariutsit, aammalu makku assigisaasa, Danmarkip suli paarisaasa, angerlaassornisaasa piareersarnissaat aamma sukumiisumik massakkut suliarineqarneri inissititersornissai Danmarkiminngaaniit, Inatsisartunut ilaasortaq Demokraatineersoq, Randi Vestergaard Evaldsen KNR-imut taama oqarpoq.
Folketingimut qinersinissaq kingusinnerpaamik juunip 17-ani pissaaq.
