Ilisimatusartoq: Qinigassanngortittut ilisimasaqarfiginnginneri qinersisartunut unammillernartuuvoq
Folketingimut qinersinissamut qaammatit amerlanerpaamik tallimanngortut danskit partiivisa qinigassanngortinniakkatik saqqummiutereerpaat.
Nunatsinnili partiit qinigassanngortittussat aqqi qinersinissap suaarutigineqareernerani aatsaat tamanut saqqummiunniarpaat. Taamaammat qinersisartut qinigassanngortikkunik politikkiannillu ilisimasaqalernissamut sapaatit akunnerinik pingasungajannik periarfissaqassapput.
Tamannalu qinersisartunut unammillernartuusut, naalagaaffiit pissusiinik ilisimatusarnermi qinersisoqartarneranullu Aarhusip Universitetiani ilisimatooq, Rune Stubager oqarpoq.
- Partiit qineqqusaarneranni oqariartuutit paasiniarsarisarpaat. Aammali qinigassanngortittut siusinnerusumi ilisimariinngikkaangamikkit kikkut partiimiinnersut imaluunniit partiit sorliit isiginnittarnerminnut assingunerunersut paasiniartarpaat.
AAMMA ATUARUK Folketingimut qinigassanngortittoq maannamut ataasiinnaasoq
Partiit oqarnerat naapertorlugu Kalaallit Nunaanni qinigassanngortittut allattorsimaffiat qinersinissamut ullup ilisimalernerani aatsaat piareerneqartarnera ileqquuvoq. Taamaakkaluartorli qinersisartunut aamma iluaqutissartaqartoq, qinersisarnermut ilisimatooq erseqqissaavoq.
Qinigassanngortittummi ilumut suli qinerneqarusunnerannik Folketingimilu sulilluarnissaannut tamanna qularnaannerususartoq, Rune Stubager nassuiaavoq.
Inuit Ataqatigiit sinnerlugu Folketingimut maanna ilaasortap, Aaja Chemnitz Larsenip Folketingimut qinigassanngorteqqinniarluni kisiartaalluni nalunaarutigereerpaa.
