Aaja: Kalaallit meerartai ikiorniarlugit danskit aningaasaliissagaluarput
Inuit Ataqatigiit folketingimi ilaasortaatitaat Aaja Chemnitz Larsen taama isumaqarpoq, aamma naak isumaginninnikkut oqartussaaffik Nunatta 1980-ikkunnili tigoreeraluaraa.
Taama nalunaaruteqarpoq, Søren Espersenip siunnersuutigereeraalu isumaginninnikkut oqartussaaffik Nunatsinniit Danmarkip tigugallartariaqaraa. Tamanna pisariaqalersinnaavoq taanna isumaqarmat namminersorlutik oqartussat meeqqanik kinguaassiutitigut atornerlunneqarsimasunik sumiginnarneqarsimasunillu ajornartorsiutaannik ikiuinissartik artoraat - sulisutigut aammalu aningaasatigut.
Aamma atuaruk Meeqqat illersuisuat: - Meeqqat illersornissaannut iliuutsivut annikippallaarput
Danskit ikiuukkiartorlugit aallatitsisariaqarput
Meeqqat Illersuisuata qanittumi erseqqissaatigaa Kalaallit Nunaat Naalagaaffiit Peqatigiit Meeqqat Pillugit Isumaqatigiissutaanik unioqqutitsisoq, ilaatigut Qaasuitsup Kommuniani meeqqanik sumiginnaaneq taakkartorlugu.
Taamaattumik Espersenip piumasaraa danskit naalakkersuisui Kalaallit Nunaannut ikiuukkiartortussanik aallartitsisariaqartut, soorlu inunnik isumaginninnermik siunnersortinik.
Siunnersuutit taakku marluk Aaja Chemnitz Larsenimit isumaginninnermullu naalakkersuisumit Martha Lund Olsenimit akuerineqanngillat.
Tassa naammaleqaaq
Kisianni Aaja Chemnitz Larsenip Espersen ilumoornerarpaa, isumaginninnermut naalakkersuisuusimasoq maannalu naalakkersuisuusoq kalaallit meerartaannik ajornartorsiungaartunik naammattumik iliuuseqarsimanngimmata.
Aamma atuaruk Søren Espersenip siunnersuutaa Martha Lund Olsenip akuerinngilaa
- Kalaallit Nunaanni isumaginninnikkut oqartussaaffik Kalaallit Nunaata ukiorpaalunngortuni tigummisimavaa, suliassarli kivissinnaasimanngilarput. Isumaqarpunga ajunngitsuusoq oqassalluni tassa naammaleqaaq, Aaja Chemnitz Larsen KNR-imut oqarpoq.
Aaja Chemnitz Larsenip taamaattumik kissaatigaa, danskit naalakkersuisuisa ajornartorsiut pillugu naalakkersuisut iliuuseqaqqullugit kimigiiserfigissagaat - pingaarnertut isumaginninnerup tungaatigut amerlanerusunik aningaasaliinikkut.
- Iliuuseqanngippatali naggataagut aaqqiissuteqarniarluni Danmark ikiuuttariaqassaaq, Danmarkilu ikiuutissaguni aningaasaliinikkut pissaaq, Aaja Chemnitz Larsen oqarpoq.
