Søren Espersenip siunnersuutaa Martha Lund Olsenip akuerinngilaa
Ilaqutariinnermut, naligiissitaanermut isumaginninnermullu naalakkersuisoq, Martha Lund Olsen, DR-ip aallakaatitassiaani P1 Morgenimi ullumi taama oqarpoq.
- Isumaginninnermi suliaqartut allat aperigukkit oqassapput Kalaallit Nunaanni aatsaat taama maannakkut suliaqartoqartigisoq.
- Qitiusumik siunnersuisarfimmik ippassaq pilersitsivugut, pikkorissaanerpassuit ingerlappagut, isumaginninnermi siunnersortitut angerlarsimaffik qimannagu ilinniarneq nutaaq aasaq aallartipparput, tassanilu Qaasuitsup Kommunianeersut 15-it peqataapput, DR-imut taama oqarpoq.
Aammattaaq kommunini sisamani tamani ilaqutariinnut sullissivinnik ammaasoqarsimanera Martha Lund Olsenip erseqqissaatigaa.
Aamma atuaruk Søren Espersen: Isumaginninnermut suliassaqarfik Danmarkip tigugallartariaqarpaa
Dansk Folkepartiip Kalaallit Nunaannut tunngasunut oqaaseqartartuata Søren Espersenip Kalaallit Nunaata suliassamik naammassisaqarsinnaannginnera pissutigalugu isumaginninnermut suliassaqarfiup Danmarkimit tigugallarneqarnissaanik oqaaseqareernerani taama oqarpoq.
- Imaanngikkaluarpoq Kalaallit Nunaanni piumassuseqartoqanngimmat, suliassarliuna nammanneqarsinnaanngitsoq. Sulisussaqartoqanngilaq pisariaqartitallu aningaasassaqartinneqanngillat, Søren Espersen taama isumaqarpoq.
Aamma atuaruk Søren Espersenip namminersorneq pillugu inatsit isornartorsiorpaa
Taama isumaqarpoq Meeqqat Illersuisuata nalunaarusiaani septembarimi saqqummersinneqartumi naqissuserneqarmat Qaasuitsup Kommuniani nunaqarfinni meerarpassuit atornerluinermik, nakuusernermik kinguaassiuutitigullu atornerlugaanermik aqqusaagaqartartut. Tamakkulu Naalagaaffiit Peqatigiit Meeqqat pillugit isumaqatigiissutaannik toqqaannartumik unioqqutitsinerupput.
Kalaallit Nunaata kisimiilluni akisussaaffigaa
Isumaginninnermut suliassaqarfiup Danmarkimit akisussaaffigineqaleqqinnissaa Martha Lund Olsenip erseqqissuliorluni tunuartippaa.
- Tamanna isumaqataaffiginngilara. Aamma taassuma nalunngilluinnarpaa. Namminersorneq pillugu isumalioqatigiissitami ilaasortaasimavoq taamaattumillu suliassaqarfiit Kalaallit Nunaannut tunniunneqarsimasut Danmarkimut utertinneqarsinnaannginneri ilisimalluarpaa, Martha Lund Olsen taama oqarpoq.
