41-nik ukiulik Nuummi nivattaassuarnik apuisimasutut eqqartuunneqartoq

Ukioq manna mianersuaalliorluni toqutsisoqarneranut suliami ullumi inerniliisoqarpoq.

Angut 41-nik ukiulik februaarip qulinganni nalunaaqutaq 07.30 arnamik 63-inik ukiulimmik Nuummi aqquserngit nikiffianni apuivoq. Nuummi Eqqartuussisoqarfik Sermersuumi eqqartuussineq naammassineqarpoq, angullu pinerluuteqaqqissaguni ulluni 30-ni pineqaatissinneqarsimasunut inissiisarfimmiittussanngortinneqassasoq eqqartuussutigineqarpoq, 45.500 koruuninillu akiligassinneqarluni.

Angut toqutsisutut pisuutinneqarluni eqqartuunneqarnermi saniatigut eqqunngitsumik unnerluutiginnissimasutut arlaleriarlunilu imigassartorsimatilluni biilinik ingerlatsisimasutut aamma eqqartuunneqarpoq. Unnerluussisut naapertorlugu imigassartorsimatilluni biilinik ingerlatsinermut pissutsit marluk ullualuinnarnik nikingassuteqarput.

Marloriarluni imigassartorsimatilluni biilertoq

Apriilip naanerani unnerluutigineqartup biili tillinneqarsimasoq nalunaarutigaa, naak angut nammineq ullormi tassani biilimik ingerlatsilluni kussinermut nakkarsimagaluarluni. Imigassartorsimanermik uuttuinermi angutip biilernermi nalaani imigassartorsimanermut promillia 2 procentiusoq paasineqarpoq.

Ullut arlallit qaangiutiinnartut angut biilerluni unitsinneqaqqippoq, tassanilu promille akuerisaasumit qaffasinnerungaatsiartoq paasineqarpoq. Uuttuinermi tassanilu imigassap promillia 2,3 procentiuvoq.

41-nik ukiullip eqqartuussissuserisuatalu imigassartorsimalluni biilernermut eqqartuussut akueraat - mianersuaalliorlunilu toqusinermut tunngasoq tunuarsimasussaatitaanermillu unioqqutitsinermut tunngasoq arnap 63-inik ukiullip toquneranik kinguneqartoq suliassanngorteqqillugu.

Tassa imaappoq eqqartuussivimmi suliap ilaa piffissami kingusinnerusukkut Nunatta Eqqartuussisuuneqarfiatigoortinneqassaaq.

Pinerluuteqaqqissaguni ullunik 30-ni pillaatissiissuteqarnissaq ima isumaqarpoq angut ukiuni tulliuttuni marlunni pinerluuteqaqqinngikkuni pineqaatissinneqarsimasunut inissiisarfimmiissanngilaq. Ukiullu marluk ingerlaneranni pinerluuteqaqqissaguni eqqartuussut atortussanngortinneqassaaq - taamaalillunilu ulluni 30-ni inissiisarfimmiittussanngussalluni.

Angutip 45.500 koruuninik akiligassinneqarnermi saniatigut ukiuni qulini biilinik ingerlatseqqusaajunnaarpoq.

Qiallunilu manittortoq

Angut imigassartorsimatilluni biilersimasutut siusinnerusukkut eqqartuussaareernikuuvoq. Maannalu taamaalioqqippoq, eqqartuussisullu eqqartuussaa 41-nik ukiulik aaottisimavoq.

Angut qiallunilu manittortoq, KNR-ip eqqartuussinermi malinnaatitaata oqaatigaa.

Unnerluussisussaatitaasup ajutoorneq 'illuatungeriinnut tamanut alianartumik ajutoornerusoq' eqqartuussinerup kingorna erseqqissaatigaa.

- Kisianni eqqartuussiviup unnerluussisussaatitaasut piumasaqaataannik malinninnerat soorunami ilorrisimaarutigilluinnarpara, naammassineqarallarporlu, unnerluussisoq, Anita Larsen eqqartuussutip suaarutigineqatsiarnerata kingorna oqarpoq.

Unnerluussisussaatitaasut ullunik 14-inik eqqarsarfissaqarnissaminnik qinnuteqarput, taakku Nunatta Eqqartuussisuuneqarfianut suliassanngortitseqqinneq qanoq oqaasertalerniarnerlu maanna nalilertussanngorpaat.

- Unnerluutigineqartup suliassanngortitseqqinnerani unnerluussisussaatitaasut aalajangersaasoqarnissaanik imaluunniit sukannernerulersitsinissamik suliassanngortitseqqinnissamut periarfissaqartarput, akissuteqannginnitsinnilu qanoq iliorniarnerluta nalilertussaavarput, Anita Larsen oqarpoq.