Løkke: Inatsit tunngaviusoq allatut nassuiarniarneqarsinnaanngilaq
Nunatta Savalimmiullu piginnaatitaanerisa, aamma nunanut allanut politikkimut tunngatillugu, Danmarkimi naalakkersuisut nikerartut inatsimmik tunngaviusumik assigiinngitsunik paasinnittaaseqarsimanerat ministeriunerup Lars Løkke Rasmussenip (V) illuatungilerpaa.
KNR-imit ukioq manna februaarimi apersorneqarnermi taama oqarpoq.
- Inatsimmut tunngaviusumut tunngatillugu piumasatsinnik iliorsinnaanitsinnik isumaqartoqarnera isumaqatiginngilara, Lars Løkke Rasmussen oqarpoq.
Nunatta Savalimmiullu nunanut allanut politikkiisa Københavnimit aalajangerneqartarnerisa piffissamut naleqqukkunnaarsimaneranik Socialdemokraatit siulittaasuata Mette Frederiksenip isumaqarnera KNR-imit pingasunngormat oqaluttuaraarput.
Inatsimmi tunngaviusumi nunatta piginnaatitaaneranut, nammineerluni nunanut allanut politikkikkut ingerlatsisinnaaneranut periarfissat ilanngullugit, aalajangersakkat pillugit Lars Løkke Rasmussenip isiginninnera Mette Frederiksenimit ilaatigut isummersorfigineqarpoq.
AAMMA ATUARUK Nunatta namminiilivinnissaanut tunngaviusumik inatsisissamut missingersuusiortoqassaaq
Nunatta Danmarkillu atassuteqarnerisa ukiuni kingullerni 40-ni malunnaatilimmik allannguuteqarsimanera innersuussutigaa. Aamma pissutsit naalagaaffiup inatsisilerituuinit inatsimmut tunngaviusumut unioqqutitsisutut nalilerneqartut naalagaaffeqatigiit iluanni kingusinnerusukkut piviusunngortinneqarsimanerat Mette Frederiksenip erseqqissaatigaa.
Inatsisilli tunngaviusup qanoq paasineqarnissaanut kikkut Danmarkimi pissaaneqartuunersut apeqqutaanngitsoq, Lars Løkke Rasmussenip KNR-imut oqaatigaa.
- Inatsisip tunngaviusup pisoqaanera ataqqineqartariaqarpoq. Inatsit tunngaviusoq allatuulli allanngorartumik nassuiarniarneqarsinnaanngilaq. Inatsit tunngaviusoq pillugu piffissap ingerlanerani ileqquliussaqartoqarsinnaavoq, imaluunniit inatsit tunngaviusoq allanngortillugu. Politikkikkulli oqallisigineqartup inatsisitigut oqallinninngortinneqarnissaa uanga akuerisinnaanngilluinnarpara.
Nunanut allanut politikkikkut periarfissat misissorneqartut
Inatsimmili tunngaviusumi nunanut allanut politikkikkut pissaaneqarneq pillugu malittarisassat allatut nassuiarnissaannut periarfissaqarsinnaavoq.
Lars Løkke Rasmussenip nammineerluni tamanna 2017-imi erseqqissaatigaa, Naalakkersuisut siulittaasuat Kim Kielsen aamma Savalimmiormiut Lagmandiat Aksel V. Johannesen isumaqatigiissuteqarfigigamigit nunanut allanut politikkimut tunngatillugu nunatta, Savalimmiut Danmarkillu akornanni killigitinneqartut annertusarneqarsinnaanersut atorfilittanit misissuiffigienqassassoq.
AAMMA ATUARUK Atlantikup avannaamiut qineqqusaartut tikkuaanissaat pillugu aalassassimaneq Lars Løkkep pisuussutiginerarpaa
Nunat pissutsinut arlalinnut assigiinngitsunik isumaqarnerisa kingunerisaanik tamanna pivoq, soorlu assersuutigalugu Ruslandimik niueqateqarneq pillugu, naak Kunngeqarfik Danmark nunanut allanut ataasiinnarmik oqaaseqartartoqartoq.
Misissuineq taanna suli naammassinngilaq. Inatsisilli tunngaviusup unioqqutinneqarneratulli tamanna inngitsoq, Løkke isumaqarpoq.
Nunattali Savalimmiullu nunanut allanut politikkikkut oqartussaaffik tamakkiisumik tigusinnaavaat - nunat namminiilivikkunik.
- Taama pisoqarmat Inatsisiliornikkut killiliisoqarunnaassaaq, naalagaaffeqatigiimmi peqataajunnaartoqarsinnaassammat, Lars Løkke Rasmussen erseqqissaavoq.
Løkke: Inatsit tunngaviusoq pillugu nammineq kukkussuteqareerpunga
Lars Løkke Rasmussenip assersuutitut taavaa qinersisarneq pillugu inatsisip allanngortinneqarnissaa 2000-ikkut aallartinnerini kissaatigisimallugu, danskisut innuttaassuseqartut ukiuni amerlanngitsuni nunani allaniittut Danmarkimi Folketingimut qinersisinnaatitaanissaat siunertaralugu.
Inatsisinilli atuutitsinermut ministereqarfimmi inatsisilerituut tamanna itigartitsissutigaat. Siunnersuutigisaatami Folketingimut qinersineq pillugu tunngaviusumik inatsimmi paragraf 29-imut unioqqutitsinissaa nalilerneqarmat.
AAMMA ATUARUK Socialdemokraatit siulittaasuat oqaluttuarisaaqatigiinnitsinni kukkusoqartarsimaneraavoq
Tamatumunnga taarsiullugu ataatsimiititaliap arlaannaanulluunniit atanngitsup qinersisarnerlu pillugu immikkut ilisimasalinnit peqataaffigineqartup akuersissutigaa nunanit allanit taasisinnaatitaaneq ukiumik ataatsimik sivitsorneqassasoq.
- Politikkikkut pingaartillugu anguniakkannut kissaatigisannullu, anguneqarsinnaanngitsumullu, taamaalillunga assersuuteqalaarpunga, Lars Løkke Rasmussen oqarpoq.
