23-nik ukiulik umitsianit tillinniartoq politiinit tigusarineqartoq

Angut 23-nik ukiulik, nukappiaqqallu ukiukitsut marluk Nuummi Iggiaani umiatsianit tillinniarsimasutut pasineqarput.

Aquttua 54-inik ukiulik nassuiaaneermini oqarpoq festeriarami taakku nassarlugit. Taamali nassuiaanera politiinit upperineqarani.

Allattoq Mads Lynge

septembarip 24-at 2023 12:36

Kalaallit Nunaanni Politiit, Nuummi Iggiaani umiatsiat ilaanni alarmip aallartinneqarsimaneranik arfininngornerup sapaallu akornanni nalunaaqutaq 03.07 kalerrinneqarput.

Politiit Iggiaanukarput, angullu 23-nik ukiulik nukappiaqqallu ukiukitsut marluk, ataaseq 14-inik ukiulik aappaalu 15-inik ukiulik tassani tigusarineqarlutik.

- Nalunaaqutaq 03.07 kalerrinneqarpugut umiatsiat ilaanni alarmi aallartissimasoq, orniguppugullu, Kalaallit Nunaanni Poliitiit pigaartuisa pisortaat Ole Hald KNR-imut oqarpoq.

Aamma atuaruk Politiit ullormut nalunaarusiaat: Ikuallattoqarnera tillinniartoqarneralu ulapputigaavut

Angut 23-nik ukiulik tillinniarsimasutut unnerluutigineqarpoq. Taanna savimmik qaammartartumillu tillinniarsimanerarneqarpoq.

Politiit nukappiaqqat ukiukitsut marluk angajoqqaavinut sianerput nukappiaqqallu angajoqqaaminnit aaneqarlutik, politiit pigaartuisa pisortaat oqarpoq.

Aqqusinermi eqqissiviilliornerit angerlarsimaffinnilu eqqissiviilliornerit ataasiakkaat eqqaassanngikkaanni ullup unnuallu kingulliup ingerlanerani ataatsimut isigalugu eqqissisimasimasoq politiit nalunaarutigaat.

Nutaarsiassami kukkunermik nassaarsimaguit uunga allaffigineqarsinnaavugut.