Politiit: Tasiilami toqusimasut tassaagunarput toqutsineq imminullu toqunneq
Kalaallit Nunaanni Politiit inuit marluk toqungasut nassaarineqartut pillugit sisamanngormat nalunaarfigineqarput.
Taakku aappariit aappaa 59-inik aappaalu 57-inik ukioqarput.
- Tasiilami inuit toqungasut marluk nassaarineqarnerannut atatillugu maannamut misissuinerup takutippaa toqutsisoqarsimagunarlunilu imminut toquttoqarsimasoq. Maannamut misissuineq toqungasut taakku saniatigut toqusoqarneranut allanik attuumassuteqartoqarsimanissaanut takussutissiinngilaq, politikommissæri, Malik Sandgreen oqarpoq.
Politiit Danmarkimit pinerluttoqarsimatillugu misissuisartunit toqusoqarsimatillugulu misissuisartunit misissueqqissaarnermi ikiorneqarput. Suli misissuisoqarpoq, Kalaallit Nunaanni Politiillu suliamut atatillugu maannakkut allanik paasissutissiisinnaanngillat.
Qanigisaasut kalerrinneqarput.
Toqungasunik marlunnik nassaarnerup aqaguani "Tasiilami innuttaasutut immikkut iliuuseqarnissamut pissutissaqanngitsoq Malik Sandgreenip paasissutissiissutigaa. Malik Sandgreenillu pinerluttoqarsimanersoq uppernarsarsinnaanagu KNR-imut ullormi tassani aamma paasissutissiisutigaa.
Nangipporlu:
- Susoqarsimanera itinerusumik oqaaseqarfigisinnaanngilarput. Tasiilami innuttaasut sunnertisimangaatsiartut paasisinnaalluarparput, kisianni misissuileruttornerput oqaatigisinnaavarput.
