Naalakkersuisut qisuariartut: USA-p radarileeqqinniarnera ajunngilaq, kisianni...
- Tassami kissaatigivarput aamma uagut. Nakkutigerusupparput kikkut imartatsinniinnersut, kikkut timmisartuniinnersut, kikkut immap ataaniinnersut. Uagut aamma kissaatigivarput nakkutigissallugu ilisimassallugulu kikkut eqqatsinni qulitsinniluunniit innersut, Inatsisartut Nunanut Allanut Sillimaniarnermullu Ataatsimiititaliap siulittaasua Pipaluk Lynge Rasmussen Inuit Ataqatigiinneersoq oqarpoq.
Amerikamiut amerlanerusunik nunatsinni radareqarfeqalernissaat taassuma aamma kissaatigaa.
Tamannalu piviusunngorataannaasoq tallimmanngormat KNR-imit oqaluttuaraarput. Tassami Kalaallit Nunaat, Danmarki USA-lu nunatsinni radarileeqqissinnaanissaq pillugu oqaloqatigiissuteqartut, Amerikamiut Københavnimi aallartitaqarfiat ilaatigut taama oqarpoq.
USA-p nunatsinni sakkutooqarfeqarnera
USA-p Pituffik 1953-imili illersornissamut atorpaat, ilaatigut Kalaallit Nunaata avannaani silaannakkut angallannermut nakkutilliissutinik radarinik ikkussiffigalugu.
USA-p nunatsinni Pituffik illersornissaqarfittut taamaallaat ullumikkut atorpaa, kunngeqarfik Danmarkimillu isumaqatigiissusioqqaarani qanorsuaq atorsinnaallugu.
Amerikap illersornissamut ministereqarfiat, Pentagonilu nunatsinni angallannermut aningaasaleerusullutik 2018-imi nalunaaruteqarput, tamanna nunatsinni innuttaasunut sakkutooqarnikkullu iluaqutaasinnaasumik.
Nunat taakku pingasut nunatsinni illersornissap annertusinissaanik kissaateqarput. Tamannalu pillugu periarfissanik misissuipput.
Arlalinnik piumasaqaatitaqassaaq
Pipaluk Lynge-Rasmussenip nunatsinni amerikamiut radarilersuinnginneranni alloriarnerit arlalioqqaassasut erseqqissarpaa. Inatsisartut sunniuteqaqataallutillu peqataatinneqartarnissaat pingaaruteqartoq taassuma oqaatigaa.
AAMMA ATUARUK Amerikamiut Pituffimmi sakkutooqarfimmut aningaasaliiniartut
Nunatsinni radarileeqqinnissaq partiinit allanit ilalerneqarpoq, tamannali aamma allanik piumasaqaatitaqartariaqartoq partiit tamanna pillugu oqaaseqartui oqarput.
Vivian Motzfeldtip, Nunanut allanut Naalakkersuisup, USA-p amerlanerusunik nunatsinni radarileeqqinnissaa KNR-ip tusatsiagaa ilumoornersoq ilumuunnginnersorluunniit pillugu aperineqarami allalluni ima akissuteqarpoq.
- USA, Danmark Kalaallit Nunaallu amerikamiut Kalaallit Nunaanni suliaqarnera pillugu oqaloqatigiittarput, ilaatigut amerikamiut Kalaallit Nunaanni soorlu radarinik attaveqaasersuinissamut aningaasaliinissaannut anguniagaqaqatigiinnermik 2018-mi nalunaarutaannut tunngasunik, Vivian Motzfeldt allappoq.
Illersornissamut Ministereqarfiup KNR-imut sapaatip akunnerata siuliani akissutaata assinganik taanna akissuteqarpoq.
Sakkutooqarfimmut annertusaanermut aningaasat milliardilikkutaat?
USA Pituffimmi maanna sakkutooqarfeqarpoq, Amerikamiullu tassani sakkutooqarnikkut qanoq iliorsinnaatitaanerat killeqanngiusarpoq.
Sumi radariliisoqarsinnaassanersoq Københavnimi illersornissamut ministeriaqarfiup maannakkuugallartoq paasissutissiissutigerusunngilaa.
USA-p Pituffimmi atortunik nutarterinissamut milliardinik aningaasaliinissani kissaatigigaa Berlingske allaaserisaqaqqammerpoq. Aningaasaliinialersaarnerli Naalakkersuisunut Folketingimulluunniit ilisimatitsissutigineqarsimanngitsoq aviisi allappoq.
USA-p Kalaallit Nunaanni attaveqaasersuutinut taamatullu sakkutooqarnermut sakkutuujunngitsunullu aningaasaleerusunnini 2018-mi nalunaarutigaa.
Nuummi Ilulissanilu mittarfissualiortoqarnissaanut USA-p aningaasaleerusussasoq taamani ilimagineqarpoq, mittarfiliornissarli danskit naalagaaffiata aningaasaliiffigivaa.