Atassutip siunnersuutaa Sulisitsisut Peqatigiiffiata akueriumanngilaa
- Eqqortoq tassaavoq aalisakkeriviit annertuumik atuinertik pissutigalugu akikilliliivigineqartarnerat, tamatuma kingunerisaanik aalisakkanik tunisassiorfiit allanut naleqqiullutik innaallagissamut imermullu akiliinikinnerusarlutik.
- Tamanna piviusunik tunngavilimmik nassuiaatissaqartaqarpoq, tassalu tamatumunnga taarsiullugu Nukissiorfiit aalajangersimasumik aningaasartuutaasa matussusernissaannut aalisakkanik tunisassiorfiit akileeqataasarneri, taamaaliornikkut innuttaasut akiliutigisartagaat appasinnerulerlutik, Sulisitsisut Peqatigiiffianni pisortaq, Brian Buus Pedersen, taama nalunaaruteqarpoq.
AAMMA ATUARUK Suliffissuit akikillisaaffigineqartarnerat Nuummi inissiarsuarniittut akilertarpaat
Assersuutitut taavaa Nuummi raajanik tunisassiorfik imermik atuinikinnerujussuusinnaagaluarmat, imermut taarsiullugu imaq tarajulik atorneqarsinnaagaluarpat, tamannali Namminersorlutik Oqartussat kissaatiginngilaat, taamaaliortoqassagaluarpammi aningaasartuuterpassuit Nuummi innuttaasunut akiligassanngortittariaqalissammata.
Paarlattuanik Aasianni aalisakkanik tunisassiorfiup imaq tarajulik atorpaa, taamaattumik innuttaasut akiligassaat allanut naleqqiullutik qaffasinnerulerlutik, aningaasartuutit tamaasa nammineerlutik nammattariaqaramikkit.
- Taamaattumik allatut oqaatigalugu Siverth K. Heilmannip Steen Lyngellu uppernarsaatissartaqanngitsumik kukkullutik oqalupput. Annertuumik atuisumut akikilliliineq tapiissutaanngilaq – akerlianik taakku nuannaarutigisariaqarluarpaat akiligassat aalaakkaasut ilarpassui tunissassiorfiit akilertarmatigit, taamaalillutik atuisut inuinnaat akiligassakinnerulerlutik, Brian Buus Pedersen taama allappoq.
Sulisitsisut: Siunnersuut eqqarsaatigilluagaanngitsoq
Taamaammat Sulisitsisut Peqatigiiffiata pisortaa isumaqarpoq annertuumik atuinermi akikilliliivigineqartarnerup atorunnaarsinneqarnissaanik Siverth K. Heilmannip Steen Lyngellu siunnersuutaat, Inatsisartut upernaakkut ataatsimiinneranni saqqummiunneqartussaq eqqarsaatigilluagaanngitsoq. Suliffissuaqarnermut tamanna millionerpassuarnik naleqassaaq, naggataatigut suliffinnik annaasaqarnermik Nunattalu karsiata akileraarutitigut isertitanik annaasaqarneranik kinguneqarluni.
