Suliffissuit akikillisaaffigineqartarnerat Nuummi inissiarsuarniittut akilertarpaat
Inissiani taakkunani najugaqartut aningaasaqarniarnikkut sanngiinnerupput utoqqaallutillu, tamatuma allanngortinneqarnissaa Inatsisartuni Atassutip ilaasortaatitaanit Siverth K. Heilmannimit Steen Lyngemillu siunnersuutigineqarpoq.
- Taamatut inissimasoqarnera Atassummit isornartoqartipparput, siunnersuuteqartut oqarput.
Nuummi inissiarsuarni inissiallit akilertarpaat
Nunami aalisakkanik suliffissuarni innaallagissamut imermullu akikillisaanermut akiliisartut tassaapput inissiarsuit Blok 1-imit 10-mut, Qapiarfiusaami, Tuujummi, Nuussuarmi inissiat il.il., Inatsisartuni ilaasortat siunnersuutiminni taama allapput nangillutillu.
- Aap, tassalu tassani inissianiillutik, innuttaaqativut aningaasaqarniarnikkut sanngiinnerusut utoqqartavullu. Tamanna eqqarsaammernarpoq. Qaammammut aningaasartuutaat malunnaatilimmik appartissinnaagaluarpavut ulluinnarni inuuniarnerat oqilisaatilaarlugu siunissamullu qaamaanerusumik takunneqqissinnaalersillugit, siunnersuuteqartut allapput.
Avatangiisinut Pinngortitamullu Naalakkersuisoqarfiup nassuiaataani siunnersuisoqarfimmit Rømbøllimit 2014-imi suliarineqartumi atuarneqarsinnaavoq nunami aalisakkanik tunisassiorfinnut innaallagissamut imermullu akikillisaanerit 2012-imi 77 millionit koruuninik amigartooruteqarfiusimasut, taakkualu akilerneqartut pingaartumik Nuummi ataatsimoorullugu kiassarnermut atuisut 80 millionit koruuninik sinneqartoorutaannit akilerneqartut, Atassutip Inatsisartuni ilaasortaatitaata siunnersuutaanni allassimavoq.
Atuisut tamarmiusut akiliutaannit akilertaleqqugaat
Nunami aalisakkanik suliffissuarni innaallagissamut imermullu akikillisaanerit maannakkutut Nuummi inissiani najugaqartut kiassarnermut akiliutaannit piunnaarlugit nunatsinni inaallagissamik atuisut tamarmiusut akiliuutaannit akilerneqartalernissaat Atassutip inatsisartuni ilaasortaatitaanit Siverth K. Heilmannimit Steen Lyngemiillu siunnersuutigineqarpoq.
Siunnersuutip siullermeerneqarnera inatsisartut upernaakkut ataatsimiineranni marsip 24-ani oqaluuserineqassaaq.
